Karl Kristian Kruse Naalakkersuisuniit tunualerpoq
Aalisarnermut, piniarnermut nunalerinermullu naalakkersuisoq Karl Kristian Kruse Naalakkersuisuni ataasinngorpat taarserneqassasoq, KNR-mi tusarparput.
Naalakkersuisut siulittaasuat Kim Kielsen oqaaseqartissinnaasimanngilarput.
Taamaammat aamma Karl Kristian Kruse sooq taamaatinniarnersoq KNR-imiit eqqortumik nassuiaatissarsisinnaasimanngilarput.
Naalakkersuisutulli angusaqarniarnini ajornakusoortissimavaa. Asersuutigalugu aalisarneq pillugu inatsisissaq arlaleriarlugu kinguartinneqartariaqarsimavoq.
Karl Kristian Kruse KNR-ip saaffiginnissutaanut aamma qisuarianngilaq.
Nikolaj Jeremiassen naalakkersuisunngortussanngorpasippoq
Karl Kristian Krusemut taarsiullugu, Nikolaj Jeremiassen KNR-imi tusakkavut naaapertorlugit aalisarnermut, piniarnermut nunalerinermullu naalakkersuisutut inissittussanngorpoq.
Naalakkersuisut siulittaasuat Kim Kielsen malittarisassat malillugit naalakkersuisunut ilaasortamik nutaamik Inatsisartunut ataasinngorpat siunnersuuteqassaaq. Qinikkat taava toqqaanermik akuersissapput.
Nikolaj Jeremiassen KNR-imut tamanna pillugu oqaaseqarumanngilaq. Nutaamik Naalakkersuisunut ilaasortaqalernissaq inatsisartut aalajangigassarigaat, taanna oqarpoq.
Karl Kristian Kruse-mik tarsiilernerup aammaarluni ersersippaa, aalisarnermut, piniarnermut nunalerinermullu naalakkersuisutut inissisimaffik pingaartoq atuuffigissallugu nalorninarnerpaanut ilaasoq. Nikolaj Jeremiassen ukiut pingasut sinnilaaginnarneranni inissisimaffimmut inissittut sisamaarilissavaat.
Karl Lyberth ukiuunngitsorluunniit tassaneereerluni januaarimi 2014-imi taamaatippoq. Taava Finn Karlsen tulliuvoq. Kisianni 2014-imi kingusinnerusukkut qinersinermi qinigaaqqinngitsoorpoq. Karl Kristian Kruselu ukiup aappaa affaq naaalakkersuisooreerluni maanna tunuarpoq.
