Krusep qaleralittassat pillugit inassuteqaat malikkumanngikkai
Kalaallit Nunaanni Aalisarsinnaanermut Akuersissutinik Nakkutilliisoqarfik - KANUAANA - kisitsisinik nutaanik sapaatit akunnerata siuliani saqqummiussaqarpoq, taakkulu Qeqertarsuup tunuani qaleralinnik tunisat malunnaatilimmik ikiliartuinnarnerannik takutitsipput.
Tamannalu tunngavigalugu Pinngortitaleriffiup Naalakkersuisunut inassutigaa pisassiissutit ikilisinneqassasut. Qeqertarsuup tunuani qaleralinniarnermi ajornartorsiutit avannaanut Uummannamut Upernavimmullu siaruaakkiartulernissaat ilisimatuut ernumagivaat.
AAMMA ATUARUK Qaleralinniarnerup avannarparternissaa aarleqqutigaarput
Taamatulli inassuteqartoqarnera Karl-Kristian Krusep malinnianngilaa.
- Qanittukkut oqaatigaara pisassiissutit ikilisinneqarnissaat naatsorsuutiginagu.
- Taava ikilisinneqassanngillat? - Aap, naalakkersuisoq taama akivoq.
Aalisarnermut piniarnermullu naalakkersuisoq siunissami qaleraleqaannarnissaa qanoq qulakkeerneqassanersoq aperineqarama ima akivoq:
- Qaleralinniat amerlisimanerat isornartorsiorneqarpoq, isumaqanngilangali ukiut tamaasa pisassiissutigisartakkagut tunngavigalugit uagut nalilersuiffigisassarigigut. Isumaqanngilanga ukioq ataasiinnaq tunngavigalugu pisassiissutinik nalilersuillunilu inassuteqartoqarsinnaasoq.
AAMMA ATUARUK Qaleralinniarneq ajorsiartuinnartoq
