Krusep aqumiut pisinnaasaat sumiuuneranit pingaartinneruai
Kalaallit aalisariutaanni aqumiut 60 procentiisa nunatsinni najugaqartutut nalunaarsorneqarsimanissaat maanna piumasaqaataavoq.
Kilisaatini inuttaasut officeriusut minnerpaamik 60 procentii Kalaallit Nunaanni najugaqartutut inuit nalunaarsorsimaffianni nalunaarsorsimanissaannik piumasaqaatip qaffanneqarnissaa Naalakkersuisunit isumaliutigineqarnersoq, Siumut sinnerlugu Inatsisartuni ilaasortap Jens Immanuelsenip, naalakkersuisunut §37 naapertorlugu apeqquteqaatigaa.
Aamma atuaruk Paasititsiniaalluni aqumiussarsiortoqalersoq
- Kalaallit Nunaanni najugaqartutut nalunaarsorsimanissaanik piumasaqaatip allanngortittariaqarsinnaanera Naalakkersuisut ingerlaavartumik nalilersuiffigisarpaat, Aalisarnermut, Piniarnermut Nunalerinermullu naalakkersuisoq Karl-Kristian Kruse, Jens Immanuelsenimut akissuteqarnermini ilaatigut taama allaaserisaqarpoq.
Royal Greenlandip kilisaataataani inuttat qanoq amerlatigisut nunatta avataani najugallit 2015-ip tamaat eqqarsaatigalugu atorfeqartinneqarnersut Jens Immanuelsenip naalakkersuisunit aamma paaserusuppaa.
Piffissami atorfeqarfigisani tamani aqumiut Kalaallit Nunaanni najugaqartutut ukiuni kingullerni marlunni nalunaarsorneqarsimasut 67 procentiusut kisitsisit takutippaat, 32 procentillu Nunatsinni najugaqartutut nalunaarsorneqarsimanngitsut, 1 procentillu Nunatsinni piffissap ilaani najugaqartutut nalunaarsorneqarsimasut.
Ingerlatseqatigiiffiit Namminersorlutik Oqartussanit pigineqartut tamarmik sapinngisamik kalaallinik sulisoqartarnissaat naalakkersuisut kissaatigigaat, Karl-Kristian Krusep akissummini ilanngullugu allaaseraa, pineqartulli suliassamut aalajangersimasumut tunngatillugu piukkunnarnerpaanik piginnaaneqarluarlutillu ilinniarsimasut atorfinitsitsisarnissaat naatsorsuutigalugu.
- Ingerlatseqatigiiffiit Namminersorlutik Oqartussani piglneqartut tamarmik sapinngisamik kalaallinik sulisoqartarnissaat kissaatigaat. tamannali ingerlatseqatigiiffiit ataasiakkaat qullersaasa akisussaaffigaat, naatsorsuutigineqarporlu pineqartut suliassamut aalajangersimasumut tunngatillugu piukkunnamerpaanik piginnaaneqarluarlutillu atorfinitsitsisarsimassasut. Ingerlatseqatigiiffiit Namminersorlutik Oqartussanit pigineqartut pitsaanerpaamik ingerlatseqatigiiffittullu nutaaliaasutut nunat tamalaat akornanni niuernissamut atugassarititaasunik malinnilluni niuertutut aammalu ingerlatseqatigiiffittut Namminersorlutik Oqartussanit pigineqartutut inuiaqaligiinni immikkut akisussaaffimminik isiginnilluni ingerlanneqarnissaat Naalakkersuisut angunigaraat, Karl-Kristian Kruse ilaatigut taama allaaserisaqarpoq.
