RAL-p pisortaa Korea Avannarlermiunik sulisoqarsimannginnerarpoq

Royal Arctic Line tusagassiorfinnut taama nalunaaruteqarpoq.

Polenimi Remontowami umiarsualiorfiup Korea Avannarlermeersunik atuisimaneranik Danmarkimi aviisit ilaat Information allaaserisaqareersorlu Royal Arctic Line taama nalunaaruteqarpoq.

Royal Arctic Linep umiarsuaataasa ilaat Korea Avannarlermiunit Remontowami umiarsualiorfimmi sanaartorneqarsimanerat Informationip ilaatigut allaaseraa.

Information naapertorlugu Polenimiut umiarsualiorfiata Remontowap umiarsualiorfittut allatut paarlattaasartussarsiuussisarfik Armex atortarsimavaa, taassumalu saniatigut umiarsualiorfik pasillerneqarpoq Korea Avannarlermiut akissarsiaasa ilarujussuinik Korea Avannarlermi kisermaassillutik naalakkersuisunut nassiussuisartutut.

Immikkut ilisimasallit isumaqarput aningaasat Korea Avannarliup atomip nukinganik pilersaarutaanut atorneqartartut.

KNR-ip Remontowami umiarsualiorfik attaveqarfiginiaraluarpaa, iluatsissinnaasimanaguli.

Remontowami umiarsualiorfiup Korea Avannarlermiunik sulisoqarneranik aviisip Informationip allaaserisaa saqqummiunneqareersorlu Royal Arctic Linep pisortaanut tupaallannartuvoq, pisorlu ippassaq ataasinngornermi misissorneqartussanngortippaa.

Taassuma maanna nalunaarutigaa Remontowami umiarsualiorfiup suleqataasalu, paarlattaasartussarsiuussisarfik Armex taakkununnga ilaallutik, Korea Avannarlermiunik sulisoqarsimanngisaannartut.

KNR paasissutissanik ilumuunngitsunik ingerlatitseqqittoq, Verner Hammekenip tusagassiuutinut nalunaarutini isornartorsiorpaa.