Korea Avannarleq immap iluani atomimik qaartartumik misileraasimanerartoq

Atomimik qaartartoq immap iluani qaartinneqarsinnaasoq misilittarsimallugu Korea Avannarliup tallimanngornermi oqaatigaa.

USA-p, Korea Kujalliup Japanillu illersornissaqarfiisa Korea Kujalliup eqqaani sungiusaqatigiissimanerannut tamanna akiniaanerusoq Korea Avannarliup oqaatigaa. USA-p umiarsuaasa ilaat timmisartut mittarfiat, atomillu nukinga atorlugu ingerlatilik sungiusarnermi ilaatigut peqataavoq.

Sungiusarneq Korea Avannarliup isumannaatsuunissaanut akornutaasoq, tamannalu pillugu atomimik qaartartumik Haeil-5-23-mik taaguutilimmik immap iluani qaartinneqarsinnaasumik qaartitsisoqartoq Korea Avannarliup oqaatigaa.

Qaartartoq taanna Korea Avannarliup imartaani ineriartortinneqaleruttorpoq, Korea Avannarliup illersornissamut ministereqarfiata Korea Avannarliup naalagaaffiata nutaarsiassaqartitsivianut KCNA-mut oqaatigaa.

Atomimik qaartartut ungasianit aqunneqarsinnaasut misilittarneqareersut, Korea Avannarliup siusinnerusukkut nalunaarutiginikuuaa, maanna misilittarneqartumut assingusunik misilittaasoqarsimalluni.

Korea Avannarlerli sakkussianik taamaattunik peqarnersoq, immikkut ilisimasallit apeqqusernikuuaat.