Kommunit unamminerat nukittoqutaaginnassaaq
Qaasuitsup Kommunia Siorapalummiit Attumut atavoq. Ukiut marluk kommunerujussuartut ingerlaneq kingumut qiviarlugu kommunip marlunnut avinneqarnissaa kissaatigineqalerpoq.
Ullumikkutut kommunit aggorneqarnerannik isornartorsiuisut Aasianni suleqatigiiffiliorput, taakkulu siunnersuutigaat Kangaatsiaq, Aasiaat, Qeqertarsuaq Qasigiannguillu immikkut kommunenngussasut. Kommune avannarlertut inissittussatut siunnersuutigaat Ilulissat, Uummannaq, Upernavik aamma Qaanaaq.
Suliniaqatigiiffik Aasiaat pillugit suleqatigiiffimmik imminut taagortoq isumaqarpoq Ilulissanut eqiterutsitsineq Aasiannut kinguneqarnerlulersoq.
- Illoqarfiit imminnut pingaarnertut inissinneqassanngillat. Illoqarfiit nunaqarfiillu immikkut imminnut aquttut pilersinneqassapput, Aasiaat pillugit suleqatigiiffik sinnerlugu Peter Frederik Gedionsen oqarpoq.
Kommunerujussuup avinneqarnissanik siunnersuut Siumup Ilulissani immikkoortoqarfianit taperserneqarpoq.
- Kommunerujussuanngorneq demokratimut kinguariaataasimavoq. Kommunalbestyrelsemi Qaanaamiit ilaasortaq ataasinnaavoq taamatuttaarlu Upernavimmi. Illoqarfiit taakku oqartussaaqataanerannut tamanna kinguariaataasimavoq, Siumut Ilulissani siulittaasoq Palle Jeremiassen KNR-imut oqarpoq.
Taanna isumaqarpoq Qaasuitsup Kommunia marlunngorlugu avinneqarpat demokrati aamma inuussutissarsiornikkut ineriartortitsineq nukittorsarneqassasut.
- Kommunit aggornerat pisoqaq atorallarmat eqqaamavarput Ilulissat aamma Aasiaat unamminerat pitsaasunik kinguneqartartoq. Illoqarfiit taakku unammeqqilerpata Avannaani inuussutissarsiornikkut ineriartorneq nukittorsarneqassaaq, Palle Jeremiassen oqarpoq.
Naalakkersuisut pilersaarput kommunit pillugit 2012-mi isumasioqatigiisitsiniarlutik. Kommunit allannguuteqassappata tamanna 2013-mi kommunemut qinersinissaq sioqqullugu pisinnaasoq Naalakkersuisut Inatsisartut ukiaanerani katersorneranni nalunaarutigaat.
