Katititsinermut uppernarsaat pisoqalisimavoq: Kommunit ullutsinnut malinnaasariaqarput
Kommunit ullutsinnut malinnaasariaqarlutillu LGBTQ+-mi inuit pisinnaatitaaffii ataqqisariaqarpaat.
LGBT+-it peqatigiiffiannik siuarsaanissamik suliaqartumi, ilanngutititsisumilu Sipineq+-imi siulittaasoq, Qillaq Olsen oqarpoq.
Taanna peqatigiiffiup katititsinermut uppernarsaatip kommunini arlalinni pisoqalisimaneranik – aamma suiaaqatigiinnut katittussanut ajornartorsiutaannginnissaanik kommuninut takutitsiniarnerata kingorna taama oqaaseqarpoq.
Peqatigiiffik aappariinnik kommunimi aalajangersimasumi katittussanit saaffigineqarsimasoq, Qillaq Olsen nassuiaavoq:
- Katititsinermut uppernarsaammik immersuisussanngoramik angutip arnallu paasissutissaataat immersussagaat allassimasimavoq, tassa kommunit suiaassusaat aalajangereersimavaat.
Utimut nalunaaruteqarniarnerat arriitsoq
Aamma naak suiaaqatigiit 2016-imi katissinnaalereersimagaluartut.
- Uppernarsaat pisoqalisimavoq. Taamaattumik kommuninut (Kommuneqarfik Sermersooq katititsinermut uppernarsaamminik nutarterereersimasoq minillugu aaqq.) attaveqarniarluta aalajangerpugut.
Qillaq Olsenip oqarnera naapertorlugu attaveqarnerannit qaammatit sisamat qaangiutereerput.
- Kommune Qeqertalik saaffiginnissutitsinnut akissuteqartutuaavoq. Taakku rigsombudimi suliap sivisuup kingornatigut katititsinermut uppernarsaatertik maanna nutartersimallugu akissutigaat, taamaalilluni uppernarsaammi "angut" aamma "arnaq" allassimajunnaarput, taarsiullugulu "aappaq 1" aamma " aappaq 2", siulittaasoq nassuiaavoq.
Kommuninit ataasiinnaap saaffiginnissutissinnut akissuteqarnera qanoq isumaqarfigaajuk?
- Kommunit naligiissitaanerup aqqanut pisinnaatitaaffitsinnullu atatillugu malinnaasariaqartut taamaallaat oqaatigisinnaavara.