Kommunit nalimmarsarneqarnerat ersernerluttumik tunngaveqarpoq
Nunatsinni kommunit sisamaasut akornanni aningaasatigut nalimmassaanerugallartoq pillugu, Naalakkersuisut Inuit Ataqatigiit siulittaasuannit, Sara Olsvigimit isornartorsiorneqarput.
Taanna isumaqarpoq nalimmassaanerugallartoq pillugu Naalakkersuisut tunngavilersuutaat ersernerluppallaartut aamma oqarluni, nalimmassaaneq ukiut pingasut qaangiuppata atuutilersinneqarpat, Naalakkersuisut aamma ersernerluttumik tunngavilersornertik ingerlateqqiinnarumaaraat.
- Oqallinnermi atorsinnaasunik paasissutissanik tigussaasunik ujartuivunga. Tassami nalimmassaarinermut tunngasut tigussaasullu tunngavigineqanngimmata ujartuillunga, Sara Olsvig oqarpoq.
Aningaasatigut nalimmassaaneq
Kommunit akornanni aningaasatigut nalimmassaanerugallartoq, 2016-imit 2018 tikillugu atuuttussaq Naalakkersuisunit juunimi saqqummiunneqarpoq.
Nalimmassaanermut tunngasoq nutaaq siunissamullu atuuttussaq, Naalakkersuisunit ukiut pingasut qaangiuppata aatsaat saqqummiunneqartussaavoq.
Tamannalu nallertinnagu nalimmassaanermut tunngasoq maanna oqallisigineqartariaqartoq, Sara Olsvig isumaqarpoq oqarluni politikkikkut isummersornerit ukiut pingasut utaqqineqartariaqanngitsut.
Kommunit aningaasatigut nalimmarsarneqarnerannut tunngatillugu kommunit ilaannit oqaatigineqarpoq, nalimmassaanermi kommunit ataasiakkaat aalisarnikkut aningaasanik isaatitsineri ilanngullugit kommunit nalimmassarneqartariaqartut.
Tamannarpiarlugu pillugu, Sara Olsvig paragraf 37 naapertorlugu arlalinnik Naalakkersuisut siulittaasuannut apeqquteqaateqarpoq.
- Aningaasat millionerpassuit kommuninit kommuninut ullumikkut nuunneqartarput. Uagullu Inuit Ataqatigiinnit nalimmassaarinissaq pisariaqarluinnartutut isigigaarput. Kisianni aamma isumaqarpugut, nalimmassaarissagaanni suut tunngaviit atorneqassanersut aalajangiiffigineqartariaqartoq.
Sara Olsvigip ilanngullugit apeqquteqaatigai, Nunatsinni oqartussat naalagaaffiullu suliffeqarfii Nunatsinni illoqarfinni sorlerni maanna inissisimanersut, aamma aperaluni kommunit maanna angissusaat Naalakkersuisunit qanoq isumaqarfigineqarnersut.
Sara Olsvigip taama aperinermini tunngavilersuutaasa ilagaat, kommunit aningaasatigut nalimmassarneqarneranni kommunit ataasiakkaat angissusaat aamma eqqarsaatigineqartariaqarmata.
- Naalakkersuisut politikkikkut isumaat atuarlugit tamanna takujuminaappoq, taamatullu Naalakkersuisut politikkikkut siunnerfiat takujuminaalluni. Allaanngilaq kommunit tunuannut Naalakkersuisut siulittaasuat toqqorluni kommunit pillugit politikkikkut oqariartuuteqarnaveersaartoq, Sara Olsvig oqarpoq.
Naalakkersuisut tunngavilersuutaat pingaaruteqarput
Kommunit akornanni nalimmassaanerit qanoq isikkoqarnissaat Sara Olsvigimut pingaarnerunngilaq pingaarnerullunili tamassumunnga Naalakkersuisut tunngavilersuutaat qanoq ittuunersut.
- Kisitsisit maannamut atorneqartut tunngavilersorneqanngimmata, apeqquserparput sooq aamma qanoq kisitsisit taama isikkoqartut nassaarineqarsimanersut, Inuit Ataqatigiit siulittaasuat, Sara Olsvig taama oqarpoq
