ASSIT Kommunit kattunneqarnerat Qeqqata Kommuniani killiffissioraat
Borgmester Hermann Berthelsenip borgmesterillu tullia Gideon Lyberthip kommunit kattutinnginnerini Maniitsoq kommuniugallarmat Sisimiullu kommuniugallarmat innuttaasut amerlassusiisa allanngoriartornerat kiisalu aningaasartuutit kommuniusimasuni qanoq ingerlasimanerat kattutereernerullu kingorna taakku qanoq inissisimanerat saqqummiuppaat.
- Kommunalbestyrelsip maluginiarpaa innuttaasut ataatsimiinnermut peqataasut saqqummiunneqartunut paasinnilluartut maannalu kommunip suliniutaanut ilaatigut akuersaarlutillu naammagisimaarinnittut saqqummiunneqartut tunngavigalugit. Soorunami peqataasut ilaatigut kattussimaneq tunngavigalugu iluarsiissutissanik taakkartuipput, Hermann Berthelsen aamma Gideon Lyberth tusagassiorfinnut nalunaarummi taama allapput.
Qeqqata Kommuniani innuttaasut naammagisimaarinnittut
Borgmester Hermann Berthelsenip naggasiilluni oqaaseqarnermini ilaatigut eqqaavaa kommunit kattussuussimanerat pillugu kommunini sisamaasuni innuttaasunik kattussuussimaneq naammagisimaarneraat/naammaginnginneraat pillugu apersuisitsisoqarsimasoq.
Kommunini sisamaasuni innuttaasut apersorneqartut amerlanersaasa Qeqqata Kommunia iluarisimaarlugu oqariartuuteqarput.
- Tassani takusinnaavarput Qeqqata Kommuniani kattunnitsinnit ukiut tallimat ingerlaneranni suliniutigut angusavullu innuttaasunit iluarisimaarneqartut, Hermann Berthelsen taama oqarpoq.
Ataatsimiititsinermi innuttaasut 42-t missaat peqataapput.
