Kommuninut qinersinerup KNR-ikkut aallakaatinneqarnissaa

Tamatumunnga atatillugu qinersisoqalerneranit pernaammik Nanortalimmit, Maniitsumit, Aasiannit pisarnertullu Nuummiit qinersisartunik ataatsimiititsinernit KNR  aallakaatitsissaaq.

- Kommuninut qinersineq najukkani tamani annertuumik pingaaruteqarmat, illoqarfinni minnerusuni soqutigisat qanimut paasisaqarfiginiarlugit, qinersisartunik ataatsimiisitsinernit aallakaatitsinissaq toqqarparput. Innuttaasunik kiffartuussivittut ullormi qinersivimmi ilisimasanik tunngaveqarluni qinersisinnaanissaq anguniarlugu, innuttaasut isumaasa ingerlateqqinneqarnissaat uagut pisussaaffigaarput, TV-kkut aallakaatitassiornermi pisortaq KNR-imilu pisortaagallartoq Jan Berg oqarpoq.

Kalaallisut qallunaatullu qinersisartunik ataatsimiisitsisoqartassaaq. Tamatuma saniatigut apeqqarissaarnerit toqqannartumik KNR2-kkut nutserneqarnissaat KNR-ip innuttaasunut neqeroorutigaa. Taamatuttaaq Facebook aallakaatitsinerni tamani ilaatinneqassaaq.

- Facebook ilanngullugu inatsisartunut qinersinissamut atatillugu aallakaatitsinerni innuttaasut qanimut attavigisinnaasimavagut - tamatuma iluatsilluarnera soorunami aamma kommuninut qinersinissami atorniarneqarpoq, TV-kkut aallakaatitassiornermi pisortaq KNR-imilu pisortaagallartoq Jan Berg oqarpoq.