Kommunini imatut inissisimasoqalerpoq
Kommuneqarfik Sermersuumi sapaatit akunnerata kingulliup naalernerani paasinarsereerpoq, Asii Chemnitz Narup borgmesteritut ingerlaannassasoq.
Kommuneqarfik Sermersuumili ataatsimiititaliani kikkut sumi issiassanersut suli maannamut inissinneqanngillat, partiilli suleqatigiittussat isumaqatigiissutissaat maanna aallunneqarnerugallarluni. Ilimagineqarporli ataatsimiititaliani suni kikkut issiassanersut sapaatit akunnerata uuma ingerlanerani aalajangerneqarumaartoq, Asii Chemnitz Narup taama nalunaarpoq.
Qinersinerup unnukkuani paasinarsereerpoq, Kommune Kujallermi ukiuni kingullerni sisamani borgmesteriusimasoq, Simon Simonsen, Siumut parteeqatiminit Jørgen Wæver Johansenimit taarserneqassasoq.
Tamannalu Jørgen Wæver Johansenip nammineerluni ullumi uppernarsaqqippaa.
- Siumumi aalajangersimasumik isumaqatigiissuteqarpugut, kommunip iluani qinersinermi qinigaanerpaat assortuussutitqanngitsumik borgmesterinngortittarlutigu. Isumaqatigiinniarnerit allat, tassalu ataatsimiitaliani kikkut kikkullu sumi sumilu issianissaannik isumaqatigiinniarnerit, sapaatip akunnerata uuma ingerlanerani naammassineqarsinnaanisaat naatsortuutigaara.
Kommune Kujallermi borgmesterinngortussaq Jørgen Wæver Johansen taama oqarpoq.
Qaasuitsup Kommuniani aamma nukigiussaqanngillat. Tassani partiit suleqatigiinnissaminnut isumaqatigiinniutaat suli oqallisigineqarput kikkullu ataatsimiititaliani sorlerni issiassanersut isumaqatigiinniutaallutik. Qaasuitsup Kommuniani borgmesterinngortussatut ilimagineqartoq, Olen Dorph, Siumut aperigatsigu, borgmesteritut inissani qulakkeersimanera, taanna akivoq taamaannerarlugu.
Qeqqata Kommuniani suli aamma nutaamik oqaluttuassarsinngilagut. Tassani borgmesteriusoq, Hermann Berthelsen, issiavimminit uppitinneqarsinnaagunanngitsup maanngagaaq oqaluttuarerusunngilaa isumaqatigiinniarnerit qanoq ingerlanersut aamma oqaluttuarerusunnagu ataatsimiititaliani kikkut sumi issiassanersut.
