Kommunimi politikkikkut sulinissaq piffissaqarfigisariaqarpoq
Annertunerusumik pissarsisimasinnaagaluarluni nunanut allanut sillimaniarnermullu ataatsimititaliami siulittaasuunissaminut kulturimullu ilinniartitaanermullu ataatsimiititaliami ilaasortaanissaminut akuersisimavoq. Taamaaliornikkut kommunimi politikkikkut pingaartitani pimoorussaanerusumik sulissitiginissaannut piffissaqarnerussaaq.
-Siulittaasunngornera nuannaarutigeqaara, aamma kulturimut ilinniartitaanermullu ataatsimiititaliami ilaasortanngorpunga. Tassalu uanga soqutigisaqarfigisupilussuusakka, aamma susassaqarfinni taakkunanerpiaq allanngueqataanissara qilanaarisupilussuuara. Susassaqarfimmut naalakkersuisunngortoq Nick Nielsen Nuummi ilinniartut ineqarfii pillugit oqaloqatigereerpara. Ilummi ajorluinnartumik tamatumani inissisimasoqarpoq, sukkanerpaamillu tamanna allanngortittariaqarparput, Per Berthelsen knr.gl-imut oqarpoq.
Borgmesterip tullerisimaa kommunimut qinersinermi qinigaalluarpoq, kommunimilu politikerit taaguunneqarnerpaat pingajoralugu. Per Berthelsenip kommunimi politikkikkut suliaqarnini ukiut siuliini kingullinngortittarsimavaa, ukiunili tullerni sisamani taamaattoqassanngilaq, Berthelsenittaaq qinigaaffiit kingullersarisinnaagaat aamma oqaatigaa.
-Ilaatigut Nuummi uumasut nakorsaannut tunngatillugu ajornartorsiutit iluarsiivigineqarnissaat pillugit qineqqusaarpunga, tassami uumasut nakorsaannik aalajangersimasumik atorfilimmik amigaateqarneq annertuupilussuuvoq. Aammattaaq kangerluutitsinni aalisakkanik allanillu uumatitsivinnik pilersitsisoqarnissaata sulissutigineqarnissaa pingaartittupilussuuara. Unamminartut annertuut ornippagut, ukiunilu tullerni sisamani politikkikkut eqeersimaartumik suleqataanissara qilanaarivara, Per Berthelsen, piffissaq politikkikkut iluatsitsivallaanngiffini qimareerlugu kingumut qiimmaqqissimasoq oqarpoq.
