Kommuni sanaartornerup aallartisarneqarnissaanut suliniuteqassaaq
- Kommuneqarfik Sermersuumi "Nunatsinneersunik pisisa"-mik politikkimik eqqussisoqarnissaa kissaatigaara, taamaaliornikkummi najukkami aningaasat kaaviaartinneqartut amerlissapput inuussutissarsiornerullu iluani annertunerumik suliaqartoqarneranik kinguneqarluni. Isumaqarpunga pisortat aningaasartuutaasa appartinniarnissaanik ujartuijuarneq piffissaq ungasinnerusoq eqqarsaatigalugu akisunaarneqarsinnaasoq, taamaattumillu piffissaq qaninnerusoq sipaarutissaagaluartoq tammaannarluni, Anda Uldum, Demokraatit sinnerlugit Kommuneqarfik Sermersuumi kommunimut qinigassanngortittoq knr.gl-imut oqarpoq.
Suliffeqarfittut anginngitsutut ingerlaavartumik nutaanik suliassaqarnissaq pisariaqarluinnarpoq, suliffeqarfinnullu aallarterlaanut - ileqqaagaqanngitsunut - suli pingaaruteqarnerulluni. Taamaammat najukkami ineriartortitsissagutta najukkami pisiniartariaqassaagut najukkami suliffeqarfiit kaaviaartitaqarnissaat qulakkeerlugu, tamannalu suliffeqarfinnut aammalu najukkami inuiaqatigiinnut iluaqutissartaqarpoq.
-Kommunip neqerooruteqarneratigut najukkami suliffeqarfiit suliassanik amerlanerusunik tunineqarnissaat sulissutiginiarpara. Najukkami suliffeqarfiit praktikkerfissanik amerlanerusunik tunniussisinnaanngussapput, najukkami akileraarnerulerlutik najukkami kaaviaartitsinissaq qulakkeerneqassaaq, Demokraatillu ilisarnaataata sunniutaa taamaasilluni ersissaaq - tassalu nammineernissamut ikiuineq, Anda Uldum oqarpoq.
