Kommuneqarfik Sermersuup meeqqat angerlarsimaffiup avataanut inissinneqartartut ikilisinniarai
Meeqqat ilaqutariillu inuuniarnermikkut ajornartorsiuteqartut ikiorneqarnissaat kommunip ukiuni tulliuttuni sisamani politikkiani suliniutiginiagaani pingaarnerit ilagaat.
- Ilaqutariit ajornartorsiuteqarpata meeraq angerlarsimaffiup avataanut inissinnagit, sapinngisamik suliniutit assigiinngitsutigut siusinaartumik iliuuseqarsinnaaffitsinni sulisassaagut, Kommuneqarfik Sermersuup Meeqqanut ilaqutariinnullu ingerlatsivimmi pisortaa Martha Lund Olsen oqarpoq.
AAMMA ATUARUK Sermersuumi inissitat pingajorarterutaat tasiilameersut
Kommuneqarfik Sermersuup meeqqat ilaqutariillu inuuniarnermikkut ajornartorsiuteqartut pillugit politikkia 2020-mit 2024-mut atuutissaaq, tassanngalu meeqqat pillugit suliat ikinnerusut, siusissukkut iliuuseqarneq ilaqutariinnullu atugarliortunut neqeroorutit pitsaanerusut ilaatigut anguniarneqassallutik.
Meeqqat pillugit suliat amerlassutsimikkut ikinnerulersinneqassasut - matumani ulloq unnuarlu angerlarsimaffinni sivisunerusumik inissiisarnerit ilanngullugit
Meeqqat inuusuttullu siusissukkut suliniutit aqqutigalugit suliniuteqarfigineqartarnerisa pitsaanerulersinneqarnissaa
Meeqqat ilaqutariillu inuuniarnermikkut ajornartorsiuteqartut pitsaasunik neqerooruteqarfigineqarnissaat
Politikki nutaaq kommunalbestyrelsimi partiinit tamanit marlunngormat akuersissutigineqarpoq.
Ilaqutariit ikiortariallit siusissukkut iliuuseqarfiginerisigut meeraq perorluni namminiileruni pitsaasumik inuuneqarnissamut periarfissaqarnerussasoq kommunalbestyrelsimi Siumumit ilaasortaq Peter Davidsen oqarpoq.
- Meeraq kinaluunniit qanorluunniit atugaqaraluaraangami ilaquttaminut aalajaattuaannarpoq. Taamaammat ilaqutariit siusinaartumik ikiorserutsigit meeraq aamma nukissamik tunissavarput. Taassumalu siunissami naapitassani assigiinngitsut akiorsinnaanerinut aamma nukissaqarnerulerluni. Taamaammat una politikki kommunalbestyrelsip torrallakkaa isumaqarpunga, Peter Davidsen oqarpoq.
Tasiilami ajornartorsiuterujussuusoq
Nuummi 18.000-it missaannik inoqartumi meeqqat 200-t missaanniittut angerlarsimaffiup avataanut inissinneqarnikuupput, Tasiilamilu quleriaatingajammik inukinnerusumi meeqqat 115-it missaanniittut inissinneqarsimapput.
Kommunili tamaat isigalugu meeqqat 337-t angerlarsimaffiup avataanut inissinneqarnikunut, ukiumullu 220 millionit koruunit atorneqartarlutik.
Inuit amerlassusaat aallaavigalugu Tasiilami ajornartorsiut anginerusut Kommuneqarfik Sermersuup Meeqqanut ilaqutariinnullu ingerlatsiviani pisortap nassuerutigaa.
- Ilumoorpoq sulisussaaleqineq Tasiilami neqeroorutitta killeqarnerannut peqqutaasorujussuuvoq, Martha Lund Olsen oqarpoq.
AAMMA ATUARUK Tasiilami kommunip pisortaa: Ullumikkut neriulluarnartoqarpoq
Tasiilamilu immikkut iliuuseqarniartoqartoq taanna oqarpoq.
- Ungecenteriliorniarsarivugut. Aqutsisunik ukioq manna atorfinitsitsinissarput kommunalbestyrelsip akuereqqammerpaa, tassa januaarip aallaqqaataani ammarnissaanut aqutsisussamik.
Meeqqat angerlarsimaffiup avataanut inissinneqarnikut katillugit 337-t missaanniipput.
Taakkunannga 200-t missaanniittut Nuummiipput.
Tasiilami 115-t missaanni.
Meeqqanut ulloq unnuarlu paaqqinnittarfinnut inissinneqarnikunut ukiumut 220 millionit koruunit kommunip aningaasartuutigisarpai.
- Taassuma saniatigut inuusuttut immikkut najugaqarfiat, Prinsesse Margrethe's børnehjemimi sanaluttarfik, timersortarfik tamakkua aamma attartorsinnaanngussavagut. Taamaalilluta inuusuttunut neqeroorutigut amerlanerujussuanngussapput, Martha Lund Olsen oqarpoq.
Taakkua saniatigut Tasiilami najugaqartut peqatigalugit ajornartorsiut aaqqiiviginiarneqartoq borgmesteri oqarpoq.
- Tasiilap innuttaasui, sulisui, suliffeqarfiit assigiinngitsut peqatigiiffiillu assigiinngitsut peqatigiillutik iluminni kivitsinissaannut aqqutissiuunneqarput.
- Taamaattumillu naatsorsuutigaarput una suliaq aallartittoq qulaaninngaanniit aalajangersaaffigiinnarnagu kisianni iluminni aallartinnera neriuuteqarfigisorujussuuarput, borgmester Charlotte Ludvigsen oqarpoq.
