Kommuneqarfik Sermersooq suli sipaarniassaaq
Missingersuutillu atuassallugit qiimmannarpallaanngitsut, borgmesterip Asii Chemnitz Narupip missingersuutit 79-inik qupperneqartut aallarniutaanni nassuerutigalugu taama allappoq.
2015-imut missingersuutini suliassaqarfinni tamani, inunnik isumaginninnermik suliassaqarfik pinnagu, annikinnerusumik aningaasartuuteqarnissaq missingersuutigineqarpoq. Taamaaliornikkut kommunit 25 millionit koruuninik sinneqartooruteqarnissamik piumasaaqaataannik naammassinninniarlugu missingersuutitigut sinneqartooruteqarnissaq qulakkeerneqassaaq.
Aammattaaq ukiut tulliini sipaarniartoqaqqittoqarnissaa kisitsisini atuarneqarsinnaavoq, kommunilli sanaartornermut ukiumoortumik 200 millionit koruuninik aningaasartuuteqarnissaa tamatumunnga aporfiussanngilaq.
- Missingersuutini takuneqarsinnaavoq kommuni pissutsit arlariit pissutigalugit aningaasaqarniarnikkut tatineqarsimasoq. Kommuneqafik Sermersooq immikkut nakkutigisassanngortinneqarsimavoq, Naalakkersuisullu kommunit akornanni nalimmassaanissamik aalajangiinerinut tunngatillugu Kommuneqarfik Sermersuup aningaasartuutitigut annertuumik annikillisaasariaqarpoq - ukiormannaannaanngitsoq, aammali ukiuni missingersuusiorfiusuni, borgmesteri oqarpoq.
Taamaammat kommunip pisariillisaanissamik suliniutai ingerlateqqinneqassapput, borgmesterillu nassuerutigaa kommunip kiffartuussineratigut annikillisaasoqassasoq taamatullu aamma sulisoqarnikkut ikilisaasoqassasoq.
Kommuneqarfik Sermersoorli akileraarummik qaffaanianngilaq, tamanna kommunimi suliassat ikileriaqqinerinik suliffissaaleqinerullu annertusineranik tamatumalu malitsigisaanik pisortat tamatumunnga aningaasartuutaannik annertusaassammat.
- Sanaartornermut missingersuutit pisariillisaarnerillu aalajangiusimaannarnerisigut kommunip tatineqarsimagaluarluni ineriartorfiuinnarnissaa qulakkeerneqassaaq, Asii Chemnitz Narup missingersuutit aallarniutaanni taama allappoq.
