Kommuneqarfik Sermersuup inuussutissarsiornermik ingerlataqartut pingaarnerit katersorai
- Inuussutissarsiortut takoriikkatsitut G20-mik annertuumik tapersersuinerat assut nuannaarutigaarput. Taamatut suleqatigiilerneq peqataasunut tamanut inuussutissarsiortunullu allanut iluaqutaassaaq.
Kommuneqarfik Sermersuumi Inuussutissarsiornermut pisortaq, Emil Skjervedal tusagassiuutinut nalunaarummi oqarpoq.
AAMMA ATUARUK Kalaallit Airports Nuummi mittarfissami siullermeertumik qaartitsilerpoq
Kommune naapertorlugu inuussutissarsiornermi ingerlataqartut pingaaruteqarnerpaat G-20-mik taallugit katersuunneqarput. Tamanna Nuummi sapaatip-akunnerata siuliani katersuutsitsisoqarnerani pivoq.
Matumani Nuup mittarfissaa tassanngalu illoqarfiit pingaarnersaata ineriartortinneqarneranut periarfissat pilersitsinermi katersuutsitsinermi oqallisigineqarput.
- Suleqatigiit ippassarli Hotel Hans Egedemi pilersinnissaannut katersuutsinneqarnerini sulilerlutik aallartereerput, ilaatigullu mittarfittaassaq atulerneranilu periarfissat immikkut sammineqarlutik, kommuni allappoq.
Ineriartortitsinissamut periarfissat nalunaarusiornerat
Katersuutsitsisoqarneranut atatillugu aamma workshoppertitsisoqarpoq. Nuummi mittarfittaarnikkut ineriartortitsinissamut periarfissat sammisaralugit workshoppertitsisoqarnerani angusat nalunaarusiornikkut katersuunneqassasut, kommuni allappoq.
Kommuneqarfik Sermersuup borgmesteriata, Charlotte Ludvigsenip (IA) inuussutissarsiortunik Nuummi ineriartortitsinissamut periarfissanik oqallisiginninnissamut katersuutsitsineq nuannaarutigaa.
- Mittarfittaartussaalluta nalunngilarput, aamma timmisartorsuit missinnaalissapput taamaalillunilu Nuuk nunarsuup sinneranut attaveqarnera qaninnerulerluni. Aamma nalunngilarput issiaruusaarluta tamakku pinissaat utaqqisinnaanatigit. Taamaattumik mittarfeqarnikkut periarfissatsialassuup qanoq atorluarneqarsinnaanera ataatsimoorullugu maannangaaq paasinialereerparput, borgmesteri tusagassiuutinut nalunaarummi oqarpoq.
Inuussutissarsiornermik ingerlataqartut saniatigut politikerit, Kommuneqarfik Sermersuumit atorfillit siunissarlu pillugu ilisimatuut aamma peqataapput.
Kommuneqarfik Sermersuup Danmarkimi siunissaq pillugu ilisimatusarfik suleqatigalugu Nuummi mittarfik nutaaq piareerpat inuussutissarsiornermi siunissami periarfissat misissorsimavai.
Suliffeqarfiit uku ataatsimeersuarnermi peqataapput:
- Royal Arctic Line
- Royal Greenland
- EMJ Atcon
- TELE-POST
- Usisaat
- Visit Greenland
- Brugseni
- CSR Greenland
- Nuuk Transport
- SIKUKI
- Guide to Greenland
- Masik
- Orbicon
- Kalaallit Forsikring
- Nuna Advokater
- Arctic Law Greenland
- BankNordik
- Grønlandsbanken
