Kommuneqarfik Sermersooq: Aningaasaqarnerput oqimaaqatigiiffiuvoq
Kommunip aningaasaqarniarnerata aaqqissuussaanera aqunneqarneratalu pitsaanngitsumik 2011-imi ingerlanneqarsimanera kukkunersuisarfiup Deloittep uaruareeraalu, kommunip pisortaanerigallagaa, Stine Johansen KNR-imut taama oqarpoq.
- Kommunip iluani isumannaallisaanermik aaqqissuussineq kommunalbestyrelsip 2012-imi aallartisartippaa, ilaatigut aningaasaqarneq eqqarsaatigalugu suleriaatsimik pitsaanerusumik sulisoqalernissaa siunertarineqarluni. Sulisut pisortallu tamanna ataatsimoorullugu suliarissavaat, Stine Johansen oqarpoq, aningaasaqarnerullu ataavartumik aqunneqarnerata tukanneranut, kommunimi pisortat taarseraannerujussuat ilaatigut pissutaasoq nassuerutigalugu.
- Kommunip aningaasaqarnerata ataavartumik ingerlanneqarnera, kommunimi pisortat taarseraannerat tamatumunnga pissutaaqataalluarsinnaavoq, taamaattorli tamanna pissutaavissutut oqaatigineqassappat illuatungaasiorneruvallaassalluni, Stine Johansen oqarpoq.
Kommuneqarfik Sermersooq ukiumut 1,3 milliard koruuninik kaaviiaartitaqartoq, 2011-imi 6,3 million koruuninik amigaartooruteqarpoq.
Ukiumi tassanerpiaq kommunip aningaasaqarnera malunnartumik pitsanngoriarsimagaluartoq, taamaattoq aningaasaqarnerup aqunneqarnera naatsorsorneqartarneralu ajornartorsiutaasimasoq, kukkunersiuisarfiup Deloittep misissuereerneratigut paasineqarpoq.
- Kommuneqarfik Sermersooq sinnerlugu innuttaasunut oqaatigissavara, kommunimi aningaasaqarnerput tunngaviusumik oqimaaqatigiiffiummat aamma tamatuminnga ingerlatsinerput ajunngimmat. Tassalu taama aamma kukkunersiuisarfimmit allapput, tamannali tusagassiuutini nalunaarutigineqarani, Stine Johansen oqarpoq, naqissuserlugulu kommunimi aningaasaqarnerup pitsaanerusumik aaqqissuussaanera sulissutigineqarluni aallartinneqareermat.
- Soorlu aamma kukkunersiusarfiup nalunaarutigigaa, aningaasaqarnerput ukiuni kingullerni pitsanngoriartuinnavissimasoq ulluinnarnilu aqutsineq aamma ajunngitsumik ingerlasoq nalunaarutigalugu. Oqaatigissavara suli suliassaqaqigatta aaqqitassanik, suli tamanna angunngilarput angussaqqaarparpulli, Kommuneqarfik Sermersuup pisortaanerigallagaa, Stine Johansen taama oqarpoq.
Borgmester Asii Chemnitz Narup kommunip aningaasaqarnerata ingerlanneqarnera pilluguoqaaseqarusunnani nalunaarpoq.
