Kommunep KANUKOKA atorunnaarsinniaraa
KANUKOKA atorunnaarseqqullugu Qaasuitsup Kommuniani Siumut siunnersuuteqarpoq, kommunalbestyrelselu tapersiilluni akuerisassanngorlugu ingerlatitseqqiivoq.
Soqutiginaatigaa Palle Jeremiassen siunnersuummut siuttuummat. Palle Jeremiassen Qaasuitsup Kommunalbestyrelsiani Siumut sinnerlugu ilaasortaavoq, KANUKOKA-milu siulittaasuulluni.
Aamma atuaruk KANUKOKA-p siunissaa suli nalunarallartoq
Siunnersuummi siunertarineqarpoq kommuunit suleqatigiiffissaannik nutaamik pilersitsinissaq, kommunalbestyrelsillu tamanna akuerisassanngorlugu innersuussutigaa. Suleqatigiiffiliornissaq kommunit tamarmik peqataaffigisaannik siunertaavoq. Suleqatigiiffik taanna siunissami suleqatigiissutaasinnaasunik siunnersuuteqassaaq.
Siunnersuummi Siumup uparuarpaa KANUKOKA-p Maniitsumut nuunniarneqarnerani sulisoq ataaserluunniit nuukkusussimanngimmat.
Taamaalilluni KANUKOKA atiinnaalluni nuussagaluarpoq ilisimalikkat misilittakkallu taamaalillutik maangaannartinneqarlutik. Tamakku pilerseqqinniaraanni ikinnerpaamik ukiut arlallit atorneqartariaqartut, Qaasuitsup Kommuniani Siumut isumaqarpoq.
AAMMA ATUARUK KANUKOKA-p siunissami qanoq ittuunissaa nalunartoq
Siunnersuummi aamma erseqqissarneqarpoq aningaasatigut kinguneriumaagai ilisimaneqanngimmata, KANUKOKA-lli illuutaasa tuniniarneqarnerisigut ilaasortaasut iluanaaruteqapallassinnaasut.