KANUKOKA-p siunissami qanoq ittuunissaa nalunartoq
Kommuneqarfik Sermersuup KANUKOKA-mut ilaasortaajunnaarnerata kingorna isertitassat ikilinerat aallaavigalugu sulisunik ikilisaasoqarnikuuvoq, kommunillu kattuffiata Maniitsumut nuuttussaanera aalajangiunngeqarluni. Ajornartorsiulli tassaavoq, sulisut sinneruttut Maniitsumut nooqataarusunnginnerat. Tamannalu unammillernassasoq, KANUKOKA-mi siulittaasup, Palle Jerimiassenip oqaatigaa.
- Ukua sulisorisagut ukiorpassuarni KANUKOKAMI sulisuunikuupput. Taavalu aamma ilisimasat, attaveqaatit, netværkit taasartagaat, tamakkua tamaviisa annaasussaavagut, taamaaattumillu KANUKOKA naqqaninngaanniit sanarfiniartussaassallutigu, Palle Jerimiassen oqarpoq.
Aamma atuaruk Kanukoka naleqqussarneqartussanngortoq
Aamma atuaruk Piumasaqaatigineqartut tamarmik Maniitsumi pigineqarput
KANUKUKA avaqqullugu isumaqatigiissut
Tamatuma saniatigut Qeqqata Kommunia Kommune Kujallerlu ungasinngitsumi suleqatigiinnissamik isumaqatigiissuteqarput. Taamaasillutik kommunit taakkua namminneerlutik KANUKOKA-p suliarisartagaanik tigusipput. Ilaatigut taakku pissutigalugit, KANUKOKA-p angissusaa oqallisigineqartariaqartoq, Palle Jerimiassenip oqaatigaa.
Aamma atuaruk Kujalleq Qeqqatalu: Misilittakkanik avitseqatigiinneq nukittorsaataassaaq
- Isumaqarpunga siunissaq qanoq ittoq orninnerlutigu ammasumik eqqartortariaqaripput. Kommuninit sulisutigut kivitsisinnaassutsit massakkut annertusinikuummata, KANUKOKA taama angitigisoq ilumut pisariaqartinneripput eqqartortariaqarparput, Palle Jerimiassen oqarpoq.
Akisussaaffiit allamut nuutsinneqarsinnaasut
KANUKOKA-lu millisinneqassaguni, oqartussaaffiisa ilai allamut nuunneqarsinnaasut, Palle Jerimiassenip takorloorpaa.
- Massakkut politikkikkut ataqatigiissaarinermut ataatsimiititaliaqarpoq, Naalakkersuisut, borgmesterit KANUKOKA-llu peqataaffigisartagaanik. Taanna immaqa allaanerusumik oqartussaaffinnik annertusaanermik tassuunakkut aamma oqartussaaffiit arlaat tassunga nuunneqarsinnaapput. Aamma tassani kommunit tamarmik peqataagamik, Kommuneqarfik Sermersooq, kommunillu KANUKOKA-mi ilaasortaasut, Palle Jerimiassen oqarpoq, Palle Jerimiassen oqarpoq.
Eqqarsaatigineqaqqaartariaqartoq
KANUKOKA-p siulersuisui ippassaq pingasunngornermi ataatsimiipput. Kattuffiulli siunissaa pillugu aalajangiisoqanngitsoq, Palle Jerimiassenip oqaatigaa.
- Ataatsimiinnitsinni kommunit eqqarsaqqinniarlutik ataatsimiinneq kinguartipparput. Taamaattumik kommunit qanoq qisuariassanersut pissanganarpoq, Palle Jerimiassen oqarpoq.
