Politikki

VIDEO Kanukoka naleqqussarneqartussanngortoq

Kommuneqarfik Sermersuup Kanukokamut ilaasortaajunnaarneratigut kommunit kattuffiata missingersuutimi 40 procentii, 4,2 millionit koruunit, ukiumut annaassavai. Taamaammat kattuffik naleqqussarneqartussanngorpoq.

Allattoq Bikki P. Kleist

novembarip 13-at 2015 14:41

- Allaffissornikkut taavalu ingerlatsinikkut tulluussartoqassaaq, tassuunalu aaqqissuussineq massakkut ingerlapparput.

- Kisianni qanoq isikkoqassanersoq massakkut oqaatigisinnaanngilara, siulersuisuni taanna suli saqqummiunnikuunnginnatsigu, Kanukokap siulittaasua, Palle Jeremiassen, KNR-imut taama oqarpoq.

Aamma atuaruk VIDEO KANUKOKA Kommuneqarfik Sermersoorlu avinniarput

Kommuneqarfik Sermersuup kattuffimmiiginnarnissaa piffissaq kingulleq tikillugu neriuutigisimagaluarpaa.

- Taakkua annaasussaassuagut, taava kommunit sinnerisa akiliutaat 6 millionit missaat aallaavigalugit Kanukokami ingerlatsineq ingerlatilissavarput, siulittaasoq taama oqarpoq.

Aamma atuaruk Asii: Kommuneqarfik Sermersuumi ernumasoqanngilaq

Kanukoka allaffissornikkut qulingiluanik sulisoqarpoq, allaffissornerli missingersuutinut nutaanut naleqqussarneqareerpat qassiussanersut suli ilisimaneqanngilaq. Palle Jeremiassenilli erseqqissaatigaa suliaq sukumiisumik suliarineqassasoq.

- Siunissami qularnatik ingerlariaqqinnissaannik oqariartornissaq tassani pisariaqarami, Palle Jeremiassen taama oqarpoq.

Kanukokalli siulittaasuata soraarsitsisoqassanersoq akiumanngilaa.

Nutaarsiassami kukkunermik nassaarsimaguit uunga allaffigineqarsinnaavugut.