Kommunep illersornissamut ministereqarfimmit ikiorneqarnissaq neriuutigaa
Kangerlussuarmi kuup qarsutsinerani ikaartarfiup nunaqarfimmi avammut kujammullu aqqutaasoq aqqutigineqarsinnaajunnaarluni aserorpoq. Silaannallu allanngoriartornerani taama eqqugaaneq tunngavigalugu Danskit illersornissamut ministeriat maanna Nunatsinnut tikeraarpoq.
Illersornissamut ministeri Nick Hækkerup ministereqarfimmit ikiuuttoqarsinnaanera pillugu oqaaseqartikkusussimagaluarparput, pissarsiarisinnaasimanaguli.
Ikaartarfiup kuup qarsutsinerani aserortup nutaamik ikaartarfiliuunneqarnissaa ajornartorsiutaavoq. Kuummi qarsutsinera suli qaffasippoq. Ikaartarfiliortoqassappallu ikaartarfik qajanaatsumik sivisuumillu atasinnaasunngorlugu suliarineqartariaqarpoq. Aqutsissaqannginneralu tunngavigalu nunaqarfiup avannaanit kujataanut killormullu ikaarfissaqanngilaq.
Tamanna pillugu Naalakkersuisoq Jens B. Frederiksen oqaaseqartsinniaraluaratsigu Qeqqata kommuneani Borgmesterip oqaloqatigineqarnissaa innersuutigaa. Borgmesterilu aperineqarami akisussaaffik Naalakkersuisuniinnerarlugu akissuteqarpoq.
-Suliassaq annertoorujussuuvoq, Danskillu illersornissamut ministeriat Naalakkersuisunit attavigineqarsimassaaq, Hermann Berthelsen Qeqqata kommuneani Borgmesteri taama oqarpoq.
- Hermann Berthelsenip Naalakkersuisunit illersornissamut ministeri qanimut naapinneqarnissaa kissaatigiguniuk taava attaveqarfigissavaanga, Jens B. Frederiksen Radioavisen taama oqarpoq.
Naalakkersuisoq Danskit illersornissamut ministereqarfianut Qeqqata kommunia sinnerlugu allagaqarsimavoq. Ikaartarfimmilli aaqqiinissamik akisussaaffik kommunep pisussaaffigigaa, Jens B. Frederiksen erseqqissaavoq.
Borgmesterip Naalakkersuisorlu marluullutik ikaartarfiup aaqqinneqapallannissaa kissaatigaat, taamaakkaluartorli qanoq ikaartarfiliortoqarnissaa suminngaanniillu aningaasaliiffigineqassanersoq suli isumaqatigiissutigineqanngilaq.
