Kommunenut tapiissutit 2,08 %-mik qaffassapput
Namminersorlutik Oqartussat kommunenut tapiissutaat akunnaallisikkaanni 1.340.000.000 koruuniupput, taakkulu kommuunit kissaatigisaannit annikinnerupput. Isumaqatigiinngissutaasoq tassaavoq akit akissarsiallu nalimmassarnissaat. Kommunit aalajangiusimajuarpaat tamanna 2,54 procentimik naleqartoq Namminersorlutik Oqartussat 2,08 procentimik allannguiniartut. Maliina Abelsen aamma Martha Abelsen isumaqatigiissummut atsiormata tamanna isumaqatigiissutaavoq.
Naalakkersuisut akileraarut 1 procentimik aparniarmassuk kommunenut tapiissutit 27,5 millioner koruuninik allanngortinneqarput. Tamatumunnga pissutaavoq akileraarutip apparneratigut kommunit isertitaat qaffattussanngormata. Tassani isertitsisutaasinnaasut tassaapput isumakkerinnittarnermut tunngasut, ilanngaatit nalikillinissat aammalu utaqqisaagallartumik inigisamut akiliuteqartalernissaq.
Kommunit Naalakkersuisullu isumaqatigiissutigaat inuusuttut ilinniagaqarnissaannut periarfissanik ujarlertuarneq ilinniarimassutsikkut qaffassaaqataasinnaasoq taamalu atugarissaarnerup ingerlaannarnissaanut tunngaviliilluni.
Aningaasarsiornerup kinguariarnera isumaqatigiinniarnerni malunnarsimavoq aammalu sutigut tamatigut isumaqatigiittoqarsinnaasimanngilaq. Taamaattoq oqaloqatigiinnerit ingerlalluarsimapput suliniutissallu inuusuttut ilinniarnissaannut suliffissaqarnissaannullu tunngasut isumaqatigiissutaallutik.