Kommune Qeqertalik: Ineqarnermut akiliutit procentinik qulinik qaffanneqalersut

Kommune Qeqertallip inissiaataani attartortut 463-it ineqarnermut akiliutigisartagaat ukiumit nutaamit procentinik qulinik qaffaavigineqassaaq. Tassa aapriilip aallaqqaataani 2022-mit.

Tamanna Kommune Qeqertalimmi kommunalbestyrelsimi amerlanerussuteqartut, Inuit Ataqatigiit aamma Atassutip, aalajangerpaat. Siumut aamma Demokraatit akerliullutik taasisut.

Kommune Qeqertalik inissiat iluarsartuunnissaannut 39 millioner koruuninik kinguaattooruteqarpoq. Tamatuma kingunerisaanik kommunip inissiaaterpassui aserfallassimapput, arlallillu najugaqarfiginissaat peqqinnarunnaarsimallutik. 

Tamannarpiarlu pissutigalugu attartornermut akiliutit qaffanngitsoorneqarsinnaasimanngillat. Ukiumi siullermi procentinik qulinik, ukiullu tulliini ukiumut procentinik pingasunik.

AAMMA ATUARUK Qeqqata Kommunia: Ineqarnermut akiliut inissiani aalajangersimasuni qaffanneqalersoq

Taama borgmester Ane Hansen Inuit Ataqatigiinnersoq KNR-imut oqaluttuarpoq.

- Taanna pissuteqarpoq ukiut siuliini kommunalbestyrelsi akitsuinissamut killikkaangami akitsuinngittuuinnartarnikuummat, Ane Hansen oqarpoq.

Ane Hansenillu oqarnera naapertorlugu tamanna ilaatigut attartornermut akiliutip aserfallatsaalinermut aningaasartuutinut malinnaasinnaannginneranik kinguneqarsimavoq, attartornermut akiliutip annerpaartaa ingerlatsinermut aningaasartuutinut matussutigineqartarsimammat.

- Soorlu igaffiit anartarfiilluunniit aserfallassimappata, tamakkununnga matussutigissallugu naammagittut, oqarpoq naqissusiillunilu:

- Maannga killissimavugut pinngitsoorata malunnaatilimmik iliuuseqartariaqarluta.

Inissiat ullutsinnut naleqquttut

Ane Hansenip oqaluttuaraa upernaaq qinersisoqarnerata kingorna Kommune Qeqertalimmi partiit tamarmik siammasissumik isumaqatigiissuteqarsimasut inigissaarnissamut aamma peqqinnartunik inissiaateqarnissamut suliaqartoqarnissaanut. 

- Taannalu anguniagaq uagut pimooruttorujuusimavarput. Inissiat ullumikkut naleqquttuunissaat kissaatigigatsigu taamatut aallartippugut, oqarpoq.

Kommune Qeqertallip, kommunalbestyrelse attartornermut akiliutinut qaffaanissamut aalajangiinnginnerani, qaffaaneq siusinaartumik pensionisialinnut, utoqqalinersialinnut, suliffissarsiortunut aamma pissaatikittunut qanoq sunniuteqassanersoq misissuiffigisimavaa.

- Tassa ineqarnermut tapiissut atorlugu qanoq annertutigisumik matuneqassanersoq. Taamaattumik taakkununnga taama annertutigisumik tussanngilaq. Akitsuutip 98 procentia tikillugu ineqarnermut tapiissummit matuneqartussaangami, Ane Hansen nassuiaavoq.

AAMMA ATUARUK Naalakkersuisut inigisanut akiliutit aappaagu qaffaaviginiaraat

Attartornermut akiliutinut qaffaanissinni procentinik appasinnerusunik aallarniuteqarsinnaasimanngilasi?

- Inissiat peqqinnarnerusut pilertornerusumik anguniarutsigit annernaraluartumik aallartiffeqartariaqarpugut, kisianni nappanneqarsinnaasumik.

Kommune Qeqertallip inissianut attartortittakkaminut akiliutinik qaffaanermigut inissiat attartortittakkat iluarsartuunnissaannut aningaasartuutinut matussutissanik pissarserusuppoq, soorlu aamma kommune sanaartugassanut pilersaarutit aningaasalersorneqarnissaanut taamaaliornermigut aamma qulakkeerinnikkusuttoq.

Kommune Qeqertallip inissiaataani attartortittakkani ineqarnermut akiliutit 1. april 2022-mit procentinik qulinik qaffanneqariarlutik, ukiut tulliini ukiumut procentinik pingasunik qaffaavigineqartassapput.