Qeqqata Kommunia: Ineqarnermut akiliut inissiani aalajangersimasuni qaffanneqalersoq
Qeqqata Kommuniani kommunalbestyrelsimi amerlanerussuteqartut inissiaatileqatigiiffiup INI-p ineqarnermut akiliutit 2022-mit qaffaavigineqarnissaanut innersuussutaat akuersissutigivaat.
Taama borgmester Malik Berthelsen (S) tusagassiuutinut nalunaaruteqarpoq.
Malik Berthelsenip erseqqissaatigaa Qeqqata Kommunia ineqarnermut akiliutinik ukiut ingerlanerani nalimmassaajuarsimasoq, taamaattumillu annertuumik qaffaanissaq pisariaqartinneqarsimanngitsoq.
- Qeqqata Kommuniani pingaartipparput innuttaasut pitsaasunik najoruminartunillu najugaqarnissaat qulakkeersimaniassallugu. Taamaammat akit akissarsiallu nalingisa ineriartornerinut nalimmassaanikkut aammalu aserfallatsaaliinermut aningaasat pisariaqartinneqartut sapinngisamik eqqanaarniarneqarnissaat anguniartuarparput, ilaatigut ineqarnermut akiliutit malinnaatinneqarnerisigut tamanna pisarluni, oqarpoq, nangillunilu:
- Ataavartumillu inissianik attartornermut akiliutit nalimmassarneqartarnerisigut ataatsikkorsuaq qaffaanissaq pinngitsoortissinnaagatsigu iluarisimaarnarpoq, taamaaliornikkut kommunip inissiaataasa aserfallatsaalineqarnissaannut isumannaatsumik kommunitsinni ingerlatsinerput kommunalbestyrelsimi amerlanerussuteqartut kingumut akuersissutigivaat.
Inissiani ukunani ineqarnermut akiliutit ukiumi nutaamit qaffaavigineqassapput:
Sisimiut:
Najugaqarfik 08-268: Kussangasoq, Ujaqqerivik, Narsannguaq, Umiivitsiaq, Niviarsiaq, Salliaq, Qeeqi blok 1-8 aamma blok 12-14, Tuapannguanut blok 1-10.
Maniitsoq:
Ungusivik B-1260 – B-1271, Qaqqaralak B-550, Illunnguit B-598, Annertusooq B-1057 – B-1066, Annertusooq B-987, B-988, B-989, B-990, B-993 & B-994, Niels Lyngep Aqq. B-961 – B-963.
Utoqqaallu pisinnaanerusut illui:
Niels Lyngep Aqq. B-1010, Annertusooq B-1399, Annertusooq B-1378 – B1380.
Aserfallatsaaliinermut kinguaattoorutikinnersaasut
Qeqqata Kommunianit nalunaarutigineqartut naapertorlugit kommune inissiaatiminut attartortittakkanut kommuninut allanut aamma Namminersorlutik Oqartussanut sanilliullugu aserfallatsaaliinermut kinguaattoorutikinnersaavoq.
Malik Berthelsenimmi oqarnera naapertorlugu kisitsit kingulliit 2016-imeersut takutippaat kommunit tamarmiusut katillugu 1,1 milliard koruunik aserfallatsaalinissamut kinguaattooruteqartut, soorlu aamma Namminersorlutik Oqartussat 1,8 milliard koruuninik kinguaattooruteqartut. Taakkunannga Qeqqata Kommunia 82 millioner koruuninik kinguaattooruteqarpoq.
Tamannali sinnassaataassanngilaq. Taama Malik Berthelsen isumaqarpoq.
- Tamatuma takutippaa piviusorsiortumik akisussaassusilimmillu ingerlatsinitsigut malinnaasinnaanerput illersorneqarsinnaasoq, Malik Berthelsen oqarpoq.
