Kommune politiillu Tasiilami piteqqamik aarlerisaarisut
Silasiorfik DMI aarlerisaarivoq, Tasiilami ualimut piteraq pitoraatissasoq. Politiiniillu kaammattuutigineqarpoq Tasiilami innuttaasut isersimaannaqqullugit.
Kalaallit Nunaanni politiit Tasiilami innuttaasunut kaammattuipput pingasunngornerup ualia tikillugu isersimaannaqqullugit.
Allattoq Karline Platou
maajip 23-at 2023 11:35
Tasiilami innuttaasut piteqqap ualimut takkunnissaanut sillimasariaqarput, DMI-mi aarlerisaarivoq, Tasiilami piteraq takkutilersoq.
Piterarlu aatsaat aqagu ualikkut qasukkariartulissasoq oqaatigineqarpoq.
Kommuneqarfik Sermersooq nittartakkamini taama allappoq.
Allakkiami allassimavoq, upalungaarsimasuniit Tasiilami najugallit kajumissaaraat pigisaminnik nalilinnik qajannaarsueqqullugit, taamatuttaaq inunnik allanik ilaqaqqullugit anorersuup pitoraannerpaaffissaani kisimiilluni toqqissisimanarnavianngimmat.
Kalaallit Nunaanni politiit aarlerisaarut Tasiilami najugalinnut facebookikkut siammarterpaat.
Ataanilu allassisoq naapertorlugu, innuttaasut kaammattorneqarput piteqqap aqagu ualikkut qaangiunnissaata tungaanut isersimaannaqqullugit.
