Kommune Kujallermi Inuit Ataqatigiit suleqatigiinnermit anivoq
Inuit Ataqatigiit Kommune Kujallermi kommunalbestyrelsimi ilaasortaatitaasa siulittaasuat Kelly Berthelsen, tusagassiuutinut nalunaarummi taama ilaatigut allaaserisaqarpoq:
- 2013-imi qinersisoqarnerata kingorna Inuit Ataqatigiit Kommune Kujallermi ilaasortaatitaat Siumumik Atassummillu suleqateqalerput, nunap immikkoortuani unammilligassat suleqatigiinnikkut kivinneqarsinnaanissaat pillugu, Kelly Berthelsen allappoq, suleqatigiinnerullu ajunngitsumik maannamut ingerlasimanera oqaluttuaralugu.
Atuartitaanerli pillugu ataatsimiititaliartaami kina siulittaasuussanersoq kommunalbestyrelsemi isumaqatigiinngissutigineqarpoq.
Kommune Kujallermi kommunalbestyrelsi 15-inik ilaasortaqarpoq, Inuit Ataqatigiit taakkunannga tallimanik ilaasortaatitaqarlutik, ataatsimiititaliani maanna tallimaasuni ataatsimi siulittaasuutitaqarlutik, Siumullu, kommunalbestyrelsimi qulingiluanik ilaasortaatitaqartoq, ataatsimiititaliani sinneruttuni sisamani siulittaasuutitaqarluni.
- Ataatsimiititaliat atuartitaanermut ataatsimiititaliamik ilaneqarnermikkut arfinilinngortussaanerat eqqarsaatigalugu Inuit Ataqatigiit ataatsimiititaliami tassani siulittaasuutitaqarnissaat pissusissamisoortutut isigivaat, partiit ilaasortaqassusaat aallaavigalugit ataatsimiititaliami tassani siulittaasuutitaqalernissaat pissusissamisoortutut isigalugu, Kelly Berthelsen oqarpoq, Inuit Ataqatigiillu ataatsimiititaliami ataatsimi maannamut siulittaasuutitaqarnerat eqqarsaatigalugu pissusissamisoortutut isigaat ataatsimiititaliami nutaami siulittaasuutitaqalernissartik, ilaasortaatitammi amerlassusaat eqqarsaatigalugu siulittaasuutitaqalernissartik pissusissamisoorsorigamikku:
- Naligiittut suleqatigiittoqarniaraanni pissusissamisoorpoq, pissutsilli massakkut atuuttut suleqataaffigisinnaanngilagut, Inuit Ataqatigiillu Kommune Kujallermi kommunalbestyrelsimi suleqateqarnermit maanna anivoq, Kelly Berthelsen oqarpoq.
