Kommune Kujalleq: Nikanarsaalluni tiingaffiginninneq akuersaanngilarput
- Nikanarsaalluni tiingaffiginninneq akuersaanngilarput, aamma suliffeqarfitsinni.
Kommune Kujalliup borgmesteria, Kiista P. Isaksen (S), taama oqarpoq.
Kommune Kujalleq KNR-ip nikarnarsaalluni tiingaffiginninneq pillugu kommunini, Namminersorlutik Oqartussani Inatsisartunilu misissuinerani peqataavoq.
Angerlarsimaffinni sullivinnilu nikanarsaalluni tiingaffiginnittoqartartoq, misissuinermi erserpoq.
Sullivimmi nikanarsagaalluni tiingaffigineqarneq suua?
- Tassaavoq inummit allamit allanilluunniit qaninngoorfigineqarneq suiaassutsimilluunniit tunngaveqartumik malersorneqarneq, ingammik sullivimmi.
- Nammineq kissaatiginngisamik attuualaarneqarnerusinnaavoq, oqaatsitigut pissusilersuutitigulluunniit tiinganiakujuffigineqarnerusinnaavoq, siuttup atorfimmik atornerluinerisinnaavaa imaluunniit toqqaannartumik pinngitsaaliilluni tiinganiakujunnerusinnaavoq.
Tusarfik: Den Store Danske.
Inuit katillutik 607-it misissuinermi peqataapput. Taakkunannga 564-it isumaqarput, nikanarsaalluni tiingaffiginninneq inuiaqatigiinni ajornartorsiutaasoq. Misissuinermi peqataasut 71 procentii taama isumaqarput.
AAMMA ATUARUK Misissuineq: 71 procentit kinguaassiuutitigut innimiilliortarneq ajornartorsiutaaneraraat
Tamannali Kommune Kujallermi ajornartorsiutaanngitsoq, borgmesteri oqarpoq.
Tassami Kommune Kujallermi sulisut inatsisinik unioqqutitsisoqarsimasorinnikkunik tamanna kinaassusertik isertuullugu nalunaarutigisinnaavaat. Tamanna sulisut toqqissillutik sulinissaannik qulakkeerisoq, borgmesteri oqarpoq.
- KNR-ip misissuinerani peqataavugut. Inatsisinimmi atuuttunik unioqqutitsinnginnissarput tamanit pingaarnerpaammat, Kiista P. Isaksen oqarpoq.
AAMMA ATUARUK Aki-Matilda Høegh-Dam: Hårdt, men vigtigt at stå frem om sexchikane
Ima iliorpugut:
-
KNR nittartakkakkut apersuinermi immersugassaq atorlugu misissuivoq.
Kommuninut tamanut, Namminersorlutik Oqartussanut Inatsisartoqarfimmullu apeqqutit nassiunneqarput.
Apersuinermi immersugassaq inunnit 5500-it missaanniittunit tiguneqarpoq.
Taakkunannga akissutit 607-it KNR-p pissarsiarai.
Misissuineq tamakkiisumik misissuinerunngilaq pineqartorli ajornartorsiutaasoq erserpoq.
- Nikanarsaalluni tiingaffiginninneq akuersaanngilarput, aamma suliffeqarfitsinni. Taamaammat kommunitsinni sulisut nikanarsaalluni tiingaffiginnissimasumik ilisimannikkunik, tamanna kinaassusertik isertuullugu immikkoortortaminni aqutsisuminnut nalunaarnissamut kaammattorpagut.
Kommune Kujalliup pisortaanerata, Dorthe Bidstrup, borgmesterertik taperserpaa.
- Sullivitsinni nikanarsaalluni tiingaffiginnittoqartassanngilaq, taamaaliorneq aamma akuersaanngilarput, taanna oqarpoq.
