Kommunalbestyrelsemut taasinerit kisinneqarneri sivikinnerusumik pinissaa neriuutaavoq
Nuummi qinersisitsisoq, Karno Lynge oqarpoq, allakkatigut taasisimasut kisinneqarneri aatsaat qinersivik matugaagat kisinneqartarmata, tamanna kinguaattoornermut ilaatigut pissutaasaartoq. Karno Lynge-p neriuutigaa unnugu kisitsinerit sivikinnerusumik ingerlanneqarumaartut.
- Allakkatigut taasinerit suliarineri sivisuumik pisarpoq, tassami taamatut qinersisimasut inuup normui eqqortuunersut paasiniaqqaarneqartarmata. Taava aanmma kisitsinermi kisitsisut inuit marluk, imminnut attuumassuteqanngitsut kisitaat pinngitsoorani assigiittussaapput. Taamanilu ajoraluartumik kisitsisit assigiinngeqattaarput. Aatsaat taakku iluatsimmata kisitsisit eqqortut qinersinermut ataatsimiititaliamut ingerlatippagut, taakkulu aatsaat kisitsisinik akuersimmata, TV-kkut tusarliunneqarput.
Nuummi qinersitsisoq, Karno Lynge neriuppoq kommunalbestyrelsemut qinersinerup kingorna, unnugu kisitsinerit sivikinnerusumik ingerlanneqarumaartut, taamaattorli taassuma oqaatigaa, kisitsisit eqqoqqissaartut nalunaarutiginissaat pingaaruteqarmat neriorsuisinnaanani unnummut kisitsinerit sivikinnerunissaannik.
