Kollegiassaaleqineq peqqissaanermik ilinniartut ilaannut akornutaasoq

Peqqissaanermik ilinniartuni 14-it Nuummi kollegiassaqannginnamik ilinniakkamik taamaatitsisariaqarsimapput ilinnianngiffeqarallartariaqarsimallutilluunniit.

Nuummi kollegiassaaleqisoqartarnera tusarnartaanngilaq.

Nuummi kollegiassarsinngitsoortut ukioq manna 37-usut, Ilinniartut Ineqarfiisa Allaffeqarfiat (KAF) ilisimatitsivoq.

Kollegiassaaleqinerlu ilinniartut ilaasa ilinnianngiffeqarallarfeqartariaqarnerannik kinguneqarpoq.

Peqqissaanermik Ilinniarfimmi 2018-imi ilinniartunngorsimasuni 14-it ukioq manna naammassinngitsoornerannik kinguneqartumik kollegiassaqannginnertik peqqutigalugu ilinnianngiffeqarallartariaqarsimapput. 

Taakku ilagaat peqqissaanermut assistentinngorniaq Najannguaq Jeremiassen Ilulissaneersoq, taannalu ukioq ataaseq ilinnianngiffeqarallarfeqartariaqarsimavoq. Taanna aappaqarpoq marlunnillu qitornaqarlutik, ilaqutariillu taakku kollegiassaaleqisimasunut ilaapput.

Peqqissaanermik Ilinniarfik

Tassani ilinniartut 100-t miissaanniipput, taakkualu tassani ilinniakkanut assigiinngitsunut arfineq-marluusunut agguataaqqapput. 
 

Tassani ilinniakkat assigiinngitsut arfineq-marluupput; porinngorniarneq, peqqissaanermi ikiortinngorniarneq, peqqissaanermut assistentinngorniarneq, kigutit nakorsaannut ikiortinngorniarneq kigutigissaasunngorniarnerlu.

Taanna suliffimmik misileereerluni atuagarsoqqittussanngorami kollegiassaqarsimannginnami qaammatini aqqaneq-marlunni ilinnianngiffeqarallartariaqarsimavoq.

- Pikkunaqaaq uannut. Ingammik atuarnera ingerlatiinaavikkusunnikuugaluarlugu naammasserusukkakku taava kollegiassarsiorneq uannut pikkunarnikuuvoq, taanna KNR-imut oqarpoq. 

Ajornartorsiutaasoq

Ilinniakkamik aqutsisup, Navarana Johansenip, tamanna ilungersunartutut aamma nalilerpaa. 

- 2018-imiit 2022-mut ilinniartuni 14-it kollegiassaqannginnertik peqqutigalugu ilinnianngiffeqarallarfeqartariaqartutut nalunaarsoqqapput. 

- Taakkua saniatigut aamma kollegiassaqannginnertik peqqutigalugu ilinnialinngitsoortariaqartutut nalunaarsoqqasut arfiniliupput. 

AAMMA ATUARUK Nuummi ukiorpassuit kollegiassaaleqineq suli taamaappoq

Kollegiassaaleqinerlu peqqutigalugu Peqqissaanermik Ilinniarfimmi ukiut tamaasa ilinnialinngitsoortoqartarnera ilungersunartoq, ilinniakkamik aqutsisoq nassuiaavoq.

- Ajornartorsiutitut isigivarput maani Peqqissaanermik Ilinniarfimminngaanniit pissutigalugu isumaqaratta uku ilinniakkat inuiaqatigiinni pingaaruteqartorujussuusut. Taavalu amerlasuut naammassitikkusuttaraluarlutigit, taamatut ilungersunartorujussuuvoq nalaataqarluni ilinniartunik aallartissinnaanngitsunik ilaa kollegiassaqannginneq peqqutaalluni, taanna oqarpoq.

Angajoqqaat ilinniartut salliunneqartariaqartut

Najannguaq Jeremiassen ukioq ataaseq ilinnianngiffeqarallartariaqareerluni atuagarsoqqileqqammerpoq. Taanna kollegiassarsinikuuvoq, ilinniartulli suli kollegiassarsinngitsoorsimasortaqarput.  

Ilinniakkamik aqutsisoq Navarana Johansen Ilinniakkamik aqutsisoq Navarana Johansen

Ilinniakkanik aqutsisup oqarnera naappertorlugu maani ilinnialersartut arnaasarput qitornaqareersut agguaqatigiissillugu 35-it missaannik ukiullit. Taakkuusarpullu ilaqutariinnut kollegiamik pissarsinngitsuukkajuttut.

KAF-i naapertorlugu kollegianik 736-nik agguaassinermi ilinniartut sumi ilinniartuuneri tunngavigalugit tulleriiaarisoqartanngilaq. Ukioq manna inuit kisimiittut 12-t itigartippagut, ilaqutariillu meerartallit 18-t itigartippagut kisimiillutillu meerallit arfineq-marluk itigartippagut, taanna oqarpoq.

KAF naapertorlugu ilinniartut ilinniartooreersut nutaavinniit salliutinneqartarput.

- Ilinniartut ilinniartooreersut atuagarsortussat soorlu qaammatini pingasuni ukiulluunniit affaani kollegiami najugaqartussat salliutittarpagut, taakkumi soorunami qanorluunniit inissaqartinneqartussaapput, Peter Hardenberg Davidsen KNR-imut arfininngormat oqarpoq. 

Kollegialilli aappaagu atulerpata inuusuttut 18-iliineqanngitsut taavalu ilaquttallit kollegiamiissinnaalissapput.

- Pingaartipparput taakku aamma inissaqarnissaat, 18-iliineqanngitsulli inissinneqartalerpata taakkununnga paarsisartussat aamma atorfinitsinneqassapput, kollegiat sinneri ilaqutalinnut kollegiaassapput,  Peter Hardenberg Davidsen oqarpoq.

Angajoqqaallu ilinniartut salliunneqarnissaat pingaaruteqartoq, SIK-p inuusuttaanneersoq Peter Mølgaard isumaqarpoq.

- Eqqaamassavarput kalaallit meerartaajaartartut amerlasoorujussuummata taakkualu aamma allatulli inissaqarlutik ilinnialersinnaasariaqarput, taanna KNR-imut arfininngormat oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl