Kokainimik 8 tonsimik Hollandimut anngiortumik eqqusseriaraluartoqartoq
Hollandimi ilanngaaserisut kokainimik aatsaat taama angitigisumik juulip ulluisa 13-ianni nassaarput. Kokaini pineqartoq Mærskip umiarsuaasa ilaani containerit ilaanni nassaarineqarpoq.
Umiarsuaatileqatigiifffiup nutaarsiassaqartitsivimmut Finansimut tamanna uppernarsarpaa.
Kokaini 8 tonsiusoq palletini bananinik usilersorneqarsimasuni toqqorneqarsimapput.
Kokaini taama angitigisoq anngiortumik tuniniarneqartuuppat 600 millionit Euronik, tassa 4,5 milliardit koruunit missaannik isertitsissutaasimassagaluartoq Hollandimi ilanngaaserisut oqaatigaat.
Kokaini Ecuadorimit Panama aqqutigalugu Hollandimi illoqarfimmut Rotterdamimut assartorneqarpoq. Hollandimi oqartussat taama ilisimatitsipput.
Ikiaroornartumillu anngiortumik eqqussuisartut tamanna atortorigunarpaat. Kokainimimmi EU-mut eqqusseriarnerit umiarsuarni assartuutini, pingaartumillu umiarsuit containerinik usisartut aqqutigalugit eqquteriaraluarneqartarput.
Ikiaroornartumik Europamut eqqusseriartunik Europami nakkutilliivik, ikiaroornartumillu atuisarnermik nakkutilliivik naliliilluni taama allappoq.
Umiarsuit Amerika Kujallermiit Europamut ingerlaarnerusartut naliliinermi aamma oqaatigineqarpoq, Brasiliamiit, Colombiamiit Ecuadorimiillu ingerlaartarlutik.
