Kofoeds Skole: Alianaqaaq
Kalaallit Danmarkimiittut amerligaluttuinnartut Kofoeds Skolemut Aalborgimiittumut ikioqqusalerput. 2009-mi 90-it atuisuupput, siorna marloriaatinngorlutik ukiormannalu ukioq qiteqqutiinnartoq kalaallit ikioqqullutik saaffiginnittut inuit 139-inngoreerput.
Allattoq Najaaraq Egede
juunip 27-at 2011 05:12
Kofoeds Skolep immikkoortortami pisortaata pisoq isumaginninneq eqqarsaatigalugu alianartuunerarpaa. DR allaaserinnippoq.
- Pilersuisoqaratik, inissaqaratik ilaallu imigassamik ajornartorsiuteqartorujussuullutik takkuttarput, Helle Rønn oqarpoq.
Taamaammat naammattumik ikiorserniarlugit suliaq imaannaanngitsuusoq oqaatigaa.
- Paasisarparput, kalaallit ilaat Danmarkimut nooreerlutik nalunaarsorneqaratik inissaqaratillu ukioq ilivitsoq inooreersimasartut, Aalborgimi Kofoed Skolemi immikkoortortami pisortaq oqarpoq.
Kalaallit qallunaanit allaanerujussuarmik eqqarsartaaseqarnerat ilaatigut Danmarkimut nuunnerminni inuuniarnermikkut ajornartorsiulerlutik ajattugaalertarnerannut pissutaasarunartoq, Helle Rønnip ilimagaa.
