Knud Mathiassen pillugu eqqartuussiviup aalajangernera nunatta eqqartuussisuuneqarfianut suliassanngorteqqinneqartoq
IA-mit politikeriusimasoq, Knud Mathiassen paniminut nakuusersimasutut unnerluutigineqarnermini Eqqartuussisoqarfik Sermersuumit sapaatit akunneri marluk matuma siorna pinngitsuutinneqarpoq.
Naak suliaq naammassisutut ikkaluartoq unnerluussisussaatitaasut suliamik Nunatta Eqqartuussisuuneqarfianut suliarineqartussanngortitseqqinniarnerlutik ullunik 14-inik eqqarsarfissaqarniarlutik aalajangerput.
Taamalu pisoqarpoq, eqqartuussivimmimi suliaq Nunatta Eqqartuussisuuneqarfianit suliarineqartussanngorteqqinneqarpoq, suliami unnerluussisoq, Lars Petersen KNR-imut paasissutissiivoq.
Unnerluutigineqarsinnaannginnera atorunnaarsinneqartoq
Knud Mathiassen paniminik naavasigut niuatigullu arfineq-marloriarluni annersitsisimasutut 2022-mi apriilimi unnerluutigineqarpoq.
IA-mi ilaasortap unnerluutigineqarnera ukioq manna apriilimi kinguneqangaatsiarpoq, taassumami unnerluutigineqarsinnaanngissusaa atorunnaarsinneqarpoq, sapaatillu akunnera qaangiutiinnartoq partiimit ilaasortaajunnaarsinneqarluni.
Politikerip unnerluutigineqarsinnaanngissusaa Inatsisartuni taasissutigineqartussanngormat inuttaata nammineq pineqarnini Facebookikkut uppernarsarpaa.
- Tassa uanga uani pineqarpunga eqqartuussaasinnaannginnera atorunnaarsinneqartussaavoq - aap ilumoorpoq eqqartuussaasussaavunga, kisianni unnerluussutit ilumoortuunngillat. Katsorsartinnera peqqutigalugu maanna sulinngiffeqarpunga - katsorsartinninnili oqaaseqarusunngilanga. Suliartoruma Tusass, IA-mit politikeri tallimanngornermi tassani allappoq, tamannali KNR-imut annerusumik oqaaseqarfigiumanngilaa.
Taanna sulinngiffeqareerluni Inatsisartuni attaviitsutut uteqqinnikuuvoq.
Oqaaseqarumanngitsoq
Knud Mathiassen eqqartuussisoqarfimmit pinngitsuutinneqarnermi kingorna suliaq aamma oqaaseqarfigiumanngilaa.
Taassuma eqqartuussissuserisua Naja Joelsen eqqartuussinerup kingunitsianngua ima oqarpoq.
- Pinngitsuutinneqarnera ilorrisimaarutigaarput.
Eqqartuussivimmi suliaq Nunatta Eqqartuussisuuneqarfiatigoortinneqalerpat unnerluussisussaatigaasut eqqartuussisoqarfimmut piumasaqaatimi assinganik tunngaviusumik piumasaqaateqarniartut, unnerluussisussaatitaasoq, Lars Petersen oqarpoq.
Taamaammat Knud Mathiassen eqqartuunneqassaguni Nunatta Eqqartuussisuuneqarfiatalu unnerluussisup piumasaqaataa malissaguniuk ulluni 40-ni pineqaatissinneqarsimasunut inissiisarfimmiittussanngortinneqassaaq.