Knud Mathiassen eqqartuussivimmi pinngitsuutitaasoq

Inatsisartuni attaviitsutut ilaasortaq Knud Mathiassen panimminik nakuuserfiiginnissimasutut pinngitsuutinneqarpoq.

Allattoq Hanna Vestergaard Hviid, Nicole Sander Bertelsen

oktobarip 12-at 2023 16:13

Nutserisoq Paornánguak Kleist , Najâraq Egede

IA-mi politikeriusimasoq Knud Mathiassen Nuummi Eqqartuussiveqarfimmi Sermersuumi ullumi pinngitsuutinneqarpoq.

Panimminut nakuusersimasutut eqqartuussivimmi unnerluutigineqarsimavoq. Unnerluussutip allattorsimaffia naapertorlugu panimi naavata niuisalu nalaatigut ikinnerpaamik arfineq marloriarluni annersarsimavaa.

Tamanna apriilimi 2022-mi pivoq pania arfineq-marluk missaannik ukioqartoq.

Allaaserisaq taamaammat allapparput

Nalinginnaasumik KNR-iiit pinngitsuutitaanerit eqqartorneq ajoraluarpagut.

Knud Mathiassenimilli suliaq allaavoq. Qinikkatut sulivoq attaviitsutullu Inatsisartuni ilaasortalluni.

KNR-imit taamaammat nalilerneqarpoq, oqaluttuap saqqummernissaa tamanut soqutiginaateqarluartoq.

Knud Mathiassen Inuit Ataqatigiit sinnerlugit Inatsisartunut qinigaavoq. Qinikkap unnerluutigineqarsinnaannginnera ukioq manna apriilimi upernaakkut ataatsimiinnermi atorunnaarsinneqarpoq.

Qinikkamik inatsisinik unioqqutitsisoqarsimaneranik pasisaqarnermi tamanna pisarpoq.

Sapaatip akunnera qaangiummat IA-mit anisinneqarpoq. Qinikkap taamaalinerani pinerluutigineqartup suunera oqaaseqarfigiumanngilaa.

Inatsisartuni ullumikkut attaviitsuuvoq.

Unnerluussisussaatitaasut ulluni 14-ini eqqarsarfeqarnissartik piumasaat - piffissap taassuma iluani suliaq Nunatta Eqqartuussivianut ingerlateqqinneqassanersoq aalajangissavaat. Illersuisoq Naja Joelsen pingitsuutitsinermik naammaginnippoq.

- Eqqartuussisut unnerluutigineqartup pineqaatissinneqarnissaanik aalajangiisuusarput, matumanilu eqqartuussinermi angut pinngitsuutinneqarpoq, taamaammat tusaatissatut tigugassarparput. Kisianni eqqartuussutip inernera allaganngorlugu tigugutsigu, unnerluussisussaatitaasutut suliaq eqqartuussivimmut qulliunerusumut ingerlateqqissanerlugu imaluunniit eqqartuussiviup aalajangiina akuerissanerlugu naliliissaagut, Lars Petersen, eqqartuussinerup kingorna oqarpoq.

Nipili illersuisumi Naja Joelsenimi allarluinnaavoq.

- Pinngitsuutinneqarnera nuannaarutigisorujussuuarput, oqarpoq.

Suliaq maanga killissanersoq imaluunniit Nunatta eqqartuussivianut ingerlatinneqassanersoq sapaatit akunneri marluk qaangiuppata paasinarsissaaq.

Nutaarsiassami kukkunermik nassaarsimaguit uunga allaffigineqarsinnaavugut.