KNR KNR Radiomi nipit nutaat
Naalaarluartartut malugereersimassavaat ullaakkut aallakaatinneqartartoq nutaaq tassaasoq ‘Nunaga inuilu’ aallartereersimasoq.
Aallakaatitassiami aallakaatitsisartuusut Malînánguaq M. Mølgaard aamma Salome Hansen sulilluni sungiusartoq Andrea Christiansen peqatigalugu naalaartartunut ulloq pitsaasumik aallarnertassavaat, nutaarsiassaqartitsillutik nutaanik aamma nuna tamakkerlugu nunani allaneersunik oqaluttuanik quianartunik ilasarlugit.
Sapaatit akunneri tamaasa aallakaatinneqartartoq ‘Oqalliffik’ pitsanngortillugu aallarteqqinneqassaaq, aallakaatitassiami aalajangersimasumik aallakaatitsisartup Søren Lyberthip sammisat politikimut aamma inuiaqatigiinnut tunngasut tulluartut oqallisigitittalerpagit.
Salomine Tobiassen aallakaatitassiami uani ‘Kultuuri’ aallakaatitassiortartuussaaq nunalu tamakkerlugu kulturimut tunngasut itisilertassallugit.
- KNR Radiomi sulisut tamarmik aallakaatitsiviusartussaq immikkoortoq manna piareersarniarlugu assut sulilluarsimapput. Uagut assut qilanaaraarput tamatuma naalaartartunut ingerlateqqinnissaa, taamak KNR-imi radiop pisortaa Masaana Egede, oqarpoq.
Qangali ilisimaneqarluartoq matuneqassaaq qaminneqarlunilu
Aallakaatitassiaq aliikkutaasoq nuannarineqartorlu ‘Aperiinnariarit’ matumani piffissami aallakaatitsiviusumi ilaatinneqassanngilaq,
KNR-imit aaqqissuisoqarfik qutsavigerujussuarparput aamma oqallinnermi peqataasartut aammattaaq naalaartartut aalajaallutik aallakaatitassiamut apeqqutinik nassiussisarsimasut ukiut qulikkaat sinnerlugit. Taakku ataatsimoorlutik nalunaaquttap akunnerpassuini nuannersunik aamma tusarnaaruminartunik tusarnaartittasimavaatigut.
KNR Radiomit piffissaq januaarip 2016-ip tungaanut atorneqarniarpoq aliikkutassiamik nutaamik pilersaarusiorneq aamma aallakaatitassanngortitsineq, neriuutigaarput taanna ‘Aperiinnariarimut’ taartaalluarsinnaassasoq.
Ilanngunneqassaaq aallakaatitassiaq nuannarineqartoq ‘Avalaappakkit’ Stina Skifte aallakaatitassiortoralugu siunissami aallakaatinneqartarnera sivitsorneqassammat sapaatit akunnerannut nal. akunnera ataatsimiit, sapaatit akunnerannut nalunaaquttap akunnerini marlunni avalaassisarnissamut.
Nipilersukkat nutaat
Ukiap ingerlanerani naalaartartut ingerlaavartumik tusaasinnaassavaat KNR Radiomi nipilersukkat atorneqartartut allanngorsimanerat.
- Naalaartartut kissaataat tusaaniarsimavavut aallakaatitsivimmilu nipilersukkut nikerannginnerusut pilersinniarlutigik sulisuutigaarput, KNR-imi radiop pisortaa Masaana Egede oqarpoq.
Nipilersukkani ilisarnaat nutaaq aallaaveqassaaq maani nunami nipilersukkanik pilersinneqartartunik, taakkununnga akulerunneqassapput nipilersukkat nunarsuarmi tamaneersut. Taakku ataatsimoortillugit nipilersukkat tassaassapput soqutiginartut aamma atoruminartut.
Paasissutissanik amerlanerusunik pissarsiniaruit KNR-imi Radiop pisortaa, Masaana Egede tlf. +299 36 15 00 imaluunniit allallutit meg@knr.gl attaveqarfigisinnaavat.
