KNR-ip siulersuisuini siulittaasussaq nassaarineqartoq
Angut nutaaq KNR-imi siulittaasunngorpoq.
KNR-ip siulersuisuini Rosannguaq Rossenip juunimi tunuarnerata kingunerani, qaammatini sisamangajanni siulittaasoqanngereersorlu Nukaraq Eugenius tusagassiorfimmi siulersuisunut siulittaasunngoqqippoq.
Nukaraq Eugenius siulersuisut siulittaasuattut 2014-imi aamma toqqarneqarnikuuvoq, taannali 2019-imi Sofie Sandgreen Berthelsenimit taarserneqarluni.
Taannali maanna siulittaasunngoqqippoq. Tusagassiorfimmi ilungersuaffiusumi siulittaasunngorpoq. Sulisut tulleriiaallutik soraararput, pisortallu tallimat ukiup kingulliup ingerlanerani soraarput.
- Maanna piffissami atuuffimmi pingajussaa KNR-ip siulersuisuini siulittaasumik nassaarniartussaasimavugut, siornatigutuullilu ajornanngitsuinnaasimanngilaq. Taamaattumik neriuuteqarluarpugut Nukaraq Eugeniusilu KNR-ip siuttuatut suleqatiginissaa qilanaaralutigu, Aqqaluaq B. Egede tusagassiuutinut nalunaarummi oqarpoq.
Miki Jensen qaammatini kingullerni siulittaasuugallarpoq. Taanna siulittaasup tulliatut atorfimminut maanna uteqqissaaq.
Piffissaq pisoqarfiungaatsiartoq
Rosannguaq Rossenip Mette Steenholdt kingoraarpaa. Taanna qaammatini 13-ini siulittaasooreerluni inuttut pissuteqartumik tunuarpoq.
Mette Steenholdtip tunuarnini tusagassiorfiup ilungersuanerani sulisussaaleqiffiuneranilu LinkedInikkut allagaqarluni nalunaarutigaa.
Ullumikkut aamma taama ilungersuasoqarpoq, tusagassiortut amigaataallutillu nutaarsiassaqartitsivimmi pisortaq aamma amigaataavoq.
