KNR pillugu KNR-ip aallakaatitai inuiaqatigiinnut annguttarput
Inuiaqatigiit 2015-imi radiukkut TV-kkullu aallakaatitanut qanoq isummersornersut KNR-ip isumasiuilluni misissuisarfik Epinion peqatigalugu ingerlappaa. Aallakaatitatigut saqqummiussat isiginnaartartunit tusarnaartartunillu qanoq isumaqarfigineqarnerat qanorlu maluginiarneqarlutillu naammagisimaarneqartiginerat apeqqutini paasiniarneqarput. Isumasiuineq suliarineqarpoq innuttaasut 18 sinnerlugit ukiullit innuttaasut sinnerinut sinniisutut isigineqarsinnaasut
tunngavigalugit.
Nalunaarusiami inerniliinerit pingaarnerit ataatsimut isigalugu pitsaasuupput, KNR-ilu tusagassiorfittut aallakaatitassiortutullu naammagisimaarneqarluni:
- Isiginnaartartut 64 % -iisa TV-kkut nutaarsiassanik KNR-ip aallakaatittaga naammagisimaanngikkunikkit naammagisimaartorujussuuaat – Qanorooq taannaavoq aallakaatittakkani isiginnaartartunit maluginiarneqarnerpaasartoq. 2014-imi 2,8-miit 2015-imi 3,0-imut naammagisimaarneqarnera qaffassimavoq, 1-imiit 4-mut toqqagassani.
- KNR-imi TV-kkut aallakaatittakkat isiginnaartartut 50 % -iisa ataatsimut isigalugitnaammagisimaarpaat. Naammagisimaarinninneq 8 % -imik 2014-imut naleqqiullugusiuariarsimavoq.
- Isiginnaartartut marluugaangata ataaseq isumaqarpoq kalaallit aallakaatitassiaannut sangujartortitsineq pitsaanerusoq imaluunniit pitsaanerujussuusoq, illuatungaatigulli arfiniliugaangata ataaseq isumaqarluni aallakaatittakka ajornerulersimasut ajornerujussuanngorsimasulluunniit.
- TV-kkut aallakaatittakkanik naammagisimaarinninneq qanoq ukioqarneq apeqqutaatinnagu qaffasippoq. TV-kkut aallakaatittakkanik naammagisimaarinninneq agguaqatigiissillugu 3,1-imik nalilerneqarpoq (1-imiit 4-mut toqqagassani), tassa 2014-imisulli. Isiginnaartartut ataatsimut naliliinerat 2014-imi 2,7-imiit 2015-imi 2,9-mut qaffassimavoq.
- Atuisut 22 %-iisa nittartagaq sap.akunneranut ataasiarlutik akulikinnerusumilluunniit alakkartarpaat, atuisullu 72 %-iisa naammagisimaarpaat naammagisimaartorujussuulluguluunniit.
- Atuisut 45 % KNR-ip nittartagaaniit aallerlutik aallakaatitanik isiginnaartarput (streamerisarput), taamaalillunilu 2014-imi misissuinermit tamanna 17 procentinik qaffariarsimalluni. Inuusuttut utoqqasaallu affaat streamerisarput, ukioqqortunerilli sisamaagaangata ataaseq streamerisarluni.
- Radiukkut nutaarsiassat kalaallisuut danskisuullu naammagisimaarneqarnerat 75 %-iullunilu 87 %-iuvoq.Tusarnaartartut 70 %-iisa KNR-ikkut aallakaatitat naammagisimaarpaat naammagisimaartorujussuullugilluunniit.
- Radiukkut aallakaatitanik naammagisimaarinninneq ukiut apeqqutaatinnagit qaffasippoq. Atuisut naammagisimaarinninnerat agguaqatigiissillugu 3,1-imiippoq (1-imiit 4-mut toqqagassani), tassa 2014-imisulli. Tusarnaartartut ataatsimut naliliinerat 2014-imi 2,5-imiit 2015-imi 2,8-mut siuariarsimavoq.
Siorna misissuinermisulli erserpoq atuisut kissaatigigaat nutaarsiassat, meeqqanoortut peqqinnerlu pillugu aallakaatitat amerlineqarnissaat. Taamaattumik 2016-imi KNR-imi pilersaarutigaarput 'Qulaarpaa' ingerlaannassasoq, aallakaatitallu peqqinnermut tunngasut 'Peqqillaraanni' aallartinneqassasut. Kingullikkut KNR-imi meeqqanut inuusuttunullu aaqqissuisoqarfik pilersinneqarpoq KNR-ip aallakaatitassiornikkut siammaaviisigut meeqqanut inuusuttunullu aallakaatitassiortussaq.
Nutaarsiassat nutaarsiassallu tunuliaqutaat KNR-ip piorsaavigerusuppai, taamattaarlu Kalaallit Nunaanni inuunermit oqaluttuat, nunaqarfinni pisartut inuiaqatigiinnullu paasissutissat pilersaarutaasunut ilaapput. KNR-imili pilersaarutaasut tamakku tamakkiisumik ingerlanneqarnissaat ajornartorsiutaavoq aningaasaliissutaasartunik ikilisaaneq pissutaalluni.
Tusagassiorfimmissaaq atortut pisoqalisut inigisallu utaqqiisaagallartut tamakkiisumik aallakaatitassiorsinnaanermut akornutaapput.
Ukiumoortumik isiginnaartartut tusarnaartartullu misissuiffigineqartarnerat KNR-ip inuiaqatigiinnit
qanoq isummersorfigineqarneranut ersersitsilluartarpoq. KNR-imi tusagassiuinikkut
aallakaattassiornikkullu ineriartorneq malinnaavigeqqissaarneqarpoq, tassuunakkullu
isiginnaartartut tusarnaartartullu KNR-imit kiffartuunneqarnerat pitsanngorsaavigineqartuarluni.
KNR pillugu misissuineq tamakkerlugu knr.gl/saqqummersitat nalaanni
Paasissutissanik amerlanerusunik pissarsiniaraanni KNR-imi siulersuisut siulittaasuat Nukaraq
Eugenius attavigineqarsinnaavoq, 36 15 00.
