KNI Royal Greenlandilu Naajaanut tunissuteqarput
Suliffeqarfiit Naajaani innuttaasunik ikiorsiisut ilaatigut tassaapput KNI A/S Royal Greenlandilu. Taakku suleqatigiillutik Naajaani innuttaasunut inuuniarnermi pingaarutilinnik assigiinngitsunik tunissuteqarput. Naajaaanilu innuttaasut ikiorserneqalernerat KNI A/S-ip pisortaanerata Peter Grønvold Samuelsenip nuannaarutigaa, ikiorsiinissamillu aalajangerneq ilaatigut nalaatsornerinnakkut pisoq aamma oqaatigaa:
AAMMA ATUARUK Naajaani piniartoq angallataaruttoq: Ilaqutariit tamakkerlutik umiatsiaaruttut
- Nunaqqataasut ilaat tupannartumik nalaataqartillugit, taavalu aamma sikulernera qimmiisalu nerukkaatissaqarniarnerat eqqarsaatigalugu eqqarsarsimavugut, taavalu aamma nalaatsorluinnartumik Upernavimmi Royal Greenlandip umiatsiaata ingerlatsisui pisiniarfimmut ippassaq ullaakkut ornigussimapput aperalutik nunaqarfimmut nassatassaateqarnersugut, namminneq taavunnaleramik akeqanngitsumik nassarsinnaagamikkit, KNI A/S-imi pisortaaneq Peter Grønvold Samuelsen oqarpoq.
Umiatsiat Naajaani ulluinnarni atorneqarnerat pingaaruteqartorujussuuvoq, piniarnermummi aalisarnermullu atorneqarnermi saniatigut Innaarsunnut Upernavimmuulluunniit, sapaatip-akunnerata ingerlanerani arlaleriarluni pisiniarfiliartoqartarpoq.
AAMMA ATUARUK Isigisaq sakkortuvoq
Naajaani innuttaasup KNR-imut oqaluttuaraa umiatsiani annaasimallugu, qimmillu nerukkaatissaannut piniarnermini atortarmagu tamanna ernummatigalugu. Ajornartorsiulli taanna maanna aaqqiivigineqartoq, KNI A/S-ip pisortaanerata oqaatigaa:
- Umiatsiaararsortut karsimik juullerpaluttunik immerlugit pajunniarlugit aalajangerpugut, taavalu aamma qimminut nerukkaatissat, kiassarnermullu orsussamik aamma pajullugit, KNI A/S-imi pisortaaneq Peter Grønvold Samuelsen oqarpoq.