Naajaani piniartoq angallataaruttoq: Ilaqutariit tamakkerlutik umiatsiaaruttut
Naajaani najugaqartut ilaat aalisarnermik piniarnermillu inuussutissarsiuteqartoq Jørgen Petersen eqqornerlunneqarpoq.
Taannami unnuaq umiatsiaaruppoq:
- Assorujussuaq eqqarsarnarpoq. Sikunngippat, sikoriataanngippat inuussutissarsiornerput ingerlariaqqinnaveerami umiatsiaaruttut, Jørgen Petersen taama oqarpoq.
Qatanngutai pingasut aamma umiatsiaaruttut
Malissuit Naajaanut unnuaq takkuttut Jørgen Petersenimut kisiat eqquinngillat, taassumami ilaqutai aamma eqqugaapput:
- Qatanngutikka pingasut aamma umiatsiaarupput, taamaalilluta ilaqutariit tamatta imaatigut angallammik isumalluutissaarukkallarpugut. Taavalu ujororput ningaarpullu aamma umiatsiaaruttunut ilaapput. Isumalluutigissagaluartigik umitsiaat ajutoorsimanngitsuugaluarpata, kisianni aamma taakku umiatsiaarupput.
AAMMA ATUARUK Isigisaq sakkortuvoq
Angallat ulluinnarni Naajaani najugalinnut pingaaruteqarpoq. Taakkummi tunisiartornerminni niuerniarnerminnillu angallat atugaraat:
- Tassa naakkineqanngikkutta pisiniarfiliarsinnaajunnaarallarpugut, Jørgen Petersen oqarpoq.
Qimmini ilanngartortariaqassagunarai
Taassuma qimmini ukiakkut piniarnermut iluaqutigilluartakkani, ikiorneqanngikkunik ikilisittariaqalernissaat aarleqqutigaa. Qimminimi nerukkaatissaqartinniarunigit angallat pingaaruteqarluinnarpoq.
- Qerneraartaqattaarnermut qimmit nerisassaannik katersuerpianngitsoornikuugatta, ilimanarpoq qanoq iliuuseqarfigineqanngikkutta ukiortaarnissaanut qimmigut ilanngartertariaqassavagut, umiatsiaaruttugut, Naajaani aalisartoq piniartorlu, Jørgen Petersen oqarpoq.