Naajaani unnuaq mallerujussuartoq: Isigisaq sakkortuvoq
Naajaani unnuaq ataatsimut qiteqquttoq mallerujussuarpoq.
Politiini pigaartup Malik Olesenip ullaarmanna tamanna uppernarsarpaa.
Naajaani mallerujussuarmat umiatsiaaqqat arfinillit arfineq marlullu missaanniittut ajoqusersimasut, qujanartumillu inunnik ajoqusertoqarsimanngitsoq, Hans Olsvig Naajaninngaaneersup oqaluttuaraa:
- Malissuit uninnissaat utaqqisimavagut soriarsinnaanata, umiatsiat pusingasut isiginnaarlutigit. Soorunami tamakkuninnga atuisuulluni isigisat nuanninngitsorujuupput.
Uuttortaaviup Naajaat eqqaaniittup unnuaq unnuap qeqqanut tanneq qulingiluanngortoq Naajaani mallerujussuartoq malugisinnaasimagaa, tamannalu iluliarujussuup aserorneranik peqquteqartoq, Trine Dahl Jensen GEUS-imeersoq KNR-imut oqaluttuarpoq.
Naak inunnik ajoqusertoqanngikkaluartoq, malissuup nunaqarfik eqqormagu misigisaq sakkortusimasoq, Hans Olsvig oqaluttuarpoq.
Umiatsiaaqqammi taakkununnga pingaaruteqarluinnartut taanna oqaluttuarpoq:
- Naliginnaasumik sapaatip akunneranut ikinnerpaamik marluk pingasulluunniit pisiniarfiliartoqartarpoq, umiatsiat atorluartorujussuupput. Aamma aalisarnerup nalaaniikkaangat tunisiartuutigalutigisarpugut maani aamma tunitsiveqannginnatta. Taavalu amigaateqaraangatta niuerniaatigisarluta, taamaammaat umiatsiaq atortorujussuusarparput. Massakkut taassa taakku soriarsinnaajunnaartutut inissipput, umiatsiaaruttut, Naajaani aalisarnermik piniarnermilu inuussutissarsiutilik, Hans Olsvig oqarpoq.
Naajaat 53-nik innuttaqarpoq.
Allaaserisaq 11:16 Hans Olsvigmit issuaanermik ilaneqarluni nutarterneqarpoq.
