KNI Peter Grønvold Samuelsenip kannguttaatsuliorfigisaanut taarsiissuteqartoq
![](/sites/default/files/styles/image_934x467/public/article_images/kni_hovedkontor_sisimiut.jpg?itok=bcbHFRZb)
Nalunaaqutaq 11:09 naqqiut: KNI-p akisussaasuunini nassuerutigigaa arnallu eqqugaasut ingerlariaqqinnissaannik ikiorniarai allaatigisami ilanngupparput.
KNI-p arnat arfinillit KNI-mi pisortaasimasumit Peter Grønvold Samuelsenimit kannguttaatsuliorfigineqarsimasutut unnerluutiginnissimasut taarsiissuteqarfiginiarlugit aalajangerpaa. Sermitsiaq.AG taama allaaserisaqarpoq.
Peter Grønvold Samuelsen eqqartuussivimmit apriilimi eqqartuunneqarpoq. Taanna qaammatini pingasuni pineqaatissinneqarsimasunut inissiisarfimmiittussanngortinneqarlunilu arnanut arfinilinnut immikkut 5.000 koruuninik taarsiissuteqassasoq eqqartuussiviup aalajangerpaa.
Taakkulu KNI-mit maanna aamma 30.000 koruuninik immikkut taarsiiffigineqartut, Sermitsiaq.AG allappoq.
KNI-p siulersuisuinut siulittaasup, Svend Hardenbergip taarsiissuteqarneq arnat KNI-mik eqqartuussivimmut suliassanngortitsinnginnissaannut aammali suliffeqarfiup eqqartugaanerlunnginnissaanut tunnganerpaa.
- KNI-p tusaamaneqarneranut aamma tunngavoq. Suliammi taama ittut suliffeqarfimmut pitsaanngitsumik sunniuteqartarput, pingaartumik eqqugaasimasunut, siulittaasoq Sermitsiaq.AG-mut oqarpoq.
KNI-p arnat eqqugaasut naaperiarniarpai. Arnat taakkua KNI eqqartuussivimmi suliassanngortissanerarnikuunngilaat, KNI-lli akisussaasuunini nassuerutigalugulu arnat taakkua ingerlariaqqinnissaannik ikiorniarpai.
Peter Grønvold Samuelsenip eqqartuussut isumaqatiginngikkaluarlugu akuerigaa
61-inik ukiullip, Peter Grønvold Samuelsenip eqqartuussummik suliassanngortitseqqinneq unitsiinnarniarlugu aalajangeraa juunip naanerani nalunaarutigineqarpoq.
Taassuma eqqartuussut nunatta eqqartuussisuuneqarfianut apriilip ulluisa 19-ianni suliassanngorteqqikkaluarpaa.
AAMMA ATUARUK Peter Grønvold Samuelsenip eqqartuussut nunatta eqqartuussisuuneqarfianut ingerlateqqinniarunnaaraa
Taanna KNI-mi sulisunut arnanut katillugit arfinilinnut kannguttaatsuliorsimasutut eqqartuunneqarpoq.
Taannali suli pinngitsuusorivoq, kisianni suliamik suliassanngortitseqqinnini inuunerminik ingerlaqqinnissani pissutigalugu unitsiinnarniarlugu aalajangerpaa. Tamanna taassuma eqqartuussissuserisuata, Finn Meinelip juunimi oqaatigaa.
- Peterp suliassanngortitseqqinnerup taamaatinnissaa maanna aalajangerpaa. Aamma naak naggataa ilorrisimaarutiginngikkaluarlugu, aamma naak suliap eqqartorneqarnera eqqartuussummilu tunngaviusoq isumaqatinngikkaluarlugu, Finn Meinel oqarpoq.
Arnat arfinillit kissaatiginngisaminnik attorneqartut
Eqqartuussivimmi suliaq pingasoriarluni kingunartinneqareerluni 2022-mi apriilip 19-ianni eqqartuussisoqarpoq.
Arnat arfinillit atorfeqarnermi nalaanni pisortarisimasaminnit kissaatiginngisaminnik attorneqartarlutik eqqartuussivimmi oqaatiginikuuaat. Matumani pukusukkut, tuikkut, siffiakkut, qitikkut, unikkut nulukkullu attorneqarnerit ilaatigut pineqarput.
AAMMA ATUARUK Kannguttaatsuliorfigineqartup inuttut ingerlaqqissinnaalernini qujamasuutigigaa
Arnat arlallit eqitsillutillu kunitsittarsimallutik kiisalu iviangequtimi ujatsiutitaatitaat tiguneqarsinnaasartut oqaloqatigiinnerillu atoqatigiinnermut sammigajuttut oqaatigaat.
Peter Grønvold Samuelsenip eqqartuussivimmi unnerluutigineqartut tamarmik eqqunngitsuunerarlutik pinngitsuutinneqarnissaminik piumasaqaraluarpoq.
Naalli eqqartuussut isumaqatiginngikkaluarlugu akueriinnarniarlugu aalajangerpaa.