Kannguttaatsuliorfigineqartup inuttut ingerlaqqissinnaalernini qujamasuutigigaa
![](/sites/default/files/styles/image_934x467/public/article_images/victoria_olsen.png?itok=uXJH83tz)
KNI-p pisortarisimasaata, Peter Grønvold Samuelsenip kannguttaatsuliorsimasutut apriilimi eqqartuussummik nunatta eqqartuussisuuneqarfianut suliassanngortitseqqinnini unitsikkaa sisamanngornermi saqqummiunneqarpoq.
Eqqartuussiveqarfiup qaammatini pingasuni pineqaatissinneqarsimasunut inissiisarfimmiitsitsisunngortitsilluni eqqartuussutaa taamaalilluni atortussanngortinneqarpoq.
Aamma arnanut arfinilinnut suliffimmi kannguttaatsuliorsimasutut unnerluutiginnittunut immikkut 5.000 koruuninik taarsiissuteqartoqarnissaa.
Victoria Olsen arnat taakku arfinillit ilagaat, taassuma eqqartuussivimmi suliap nunatta eqqartuussiviani suliarineqartussaajunnaarnera killitsissutigaa.
- Upperiuminaatsillugu, qanoq qisuariassanerlunga naluara. Qamuunalu aamma oqiliallanneq nuannaajummernerlu, Victoria Olsen oqarpoq.
Eqqartuussivimmi suliaq pingasoriarluni taamaatinneqareerluni 2022-mi apriilip ulluisa 19-ianni eqqartuussut suaarutigineqarpoq. Peter Grønvold Samuelsenillu eqqartuussut pinngitsuutinneqarnissamik piumasaqarluni suliassanngorteqqippaa, taamaalilluni nunatta eqqartuussisuuneqarfiani suliarineqartussanngortillugu. Taamaammat suliap maanna tassa naammassineqarnera Victoriap nuannaarutigaa.
- Nalunngilarput qaquguugaluartorluunniit naammassisussaasoq, qujavangalu sivitsorujussuartinnagu naammassineqarmat. Soorunami aamma uagut inuttut ingerlariaqqinnissarput piffissanngormat.
Isiginngitsuusaaginnarneqarsinnaanngitsut
Victoria Olsenip suliamik unnerluutiginninnertik pingaaruteqarsoraa. Imminnut naapertuilluartumik naammassineqarnissaa kisiat pinnagu arnalli aamma allat assingusumik nalaataqarsinnaasut.
- Taamatut tunniussinitsinni aallaqqaataaniilli una siunertaavoq, arnat uagutsitulli misigisartut, uagutsitullu misigitikkusunnagit, tassami taamaattut pisut isiginngitsuusaaginnarneqarsinnaangimmata.
Taassuma suliffeqarfiit allat assingusumik iliuuseqartoqaqqunagu, assersuutigalugu innimiilliortoqannginnissaanut politikkimik atulersitsinerat takugaangamikku nuannaarutigisarlugu oqaatigaa.
Arnat suliffimmi kannguttaatsuliorfigineqarnerminnik oqaluuserisaqarnissaat pingaaruteqartoq taanna isumaqarpoq, taassumalu allat taama nalaataqartut ikiorusuppai.
- Uattulli misigisaqarsimasut, sapinngisannik ikiorusuppakka, arlaannilluunniit oqaloqatigalugit. Nalunngilarami tassaniilluni qanoq oqimaatsigisinnaasoq, Victoria Olsen oqarpoq.
Eqqartuussivimmi suliaq
61-inik ukiulik, Peter Grønvold Samuelsen arnanut katillugit arfinilinnut Namminersorlutik Oqartussat suliffeqarfiutaani sulisunut kannguttaatsuliorsimasutut unnerluutigineqarpoq.
Arnat arfinillit atorfeqarnermi nalaanni pisortarisimasaminnit kissaatiginngisaminnik attorneqartarlutik eqqartuussivimmi oqaatiginikuuaat. Matumani pukusukkut, tuikkut, siffiakkut, qitikkut, unikkut nulukkullu attorneqarnerit ilaatigut pineqarput.
Arnat arlallit eqitsillutillu kunitsittarsimallutik kiisalu iviangequtimi ujatsiutitaatitaat tiguneqarsinnaasartut oqaloqatigiinnerillu atoqatigiinnermut sammigajuttut oqaatigaat.
Peter Grønvold Samuelsenip eqqartuussivimmi unnerluutigineqartut tamarmik eqqunngitsuunerarlutik pinngitsuutinneqarnissaminik piumasaqaraluarpoq.
Peter Grønvold Samuelsenilli eqqartuussutip inernera akueriniarlugu maanna aalajangerpoq.
Taannali pinngitsutut suli imminut isigisoq, inuuninili ingerlateqqinniarlugu eqqartuussutip suliassanngorteqqinneqarnera unitsiinnarniarpaa. Taassuma eqqartuussissuserisua, Finn Meinel KNR-imut oqarpoq.
- Piitap suliassanngortitseqqinnerup taamaatinnissaa maanna aalajangerpaa. Aamma naak naggataa ilorrisimaarutiginngikkaluarlugu, aamma naak suliap eqqartorneqarnera eqqartuussummilu tunngaviusoq isumaqatinngikkaluarlugu, Finn Meinel oqarpoq.