KNI-mi aqutsisussat toqqarneqarput
KNI tusagassiuutinut nalunaarummi ullumi allappoq, pisortaanerugallareerluni Peter Grønvold Samuelsen juunip aallaqqaataani 2014 pisortaaninngortoq.
Maannamut aningaasaqarnermut pisortaagallartitaasoq Jan H. Lynge-Pedersen aningaasaqarnermut pisortatut atorfinitsivinneqarpoq. Kiisalu naatsorsuuserinermut pisortaq Per Jensen november 2013-imi pisortaanerup soraarsitaaneranut akerliulluni atorfimminit tunuarniarluni ilimasaarisimagaluartoq atorfinitsivinneqarpoq.
Polaroil-imi pisortatut Peter Grønvold Samuelsenip atorfik qimataa Tage Lindgaard-imit kingoraarneqassaaq.
Siulersuisut siulittaasuat Niels Thomsen naapertorlugu siulersuisut isumaqatigiittut Peter Grønvold Samuelsen atorfinitsippaat.
KNI'p siunissami suliassaa tassaassooq KNI'p pilersuisussaatitaanini kisiat qitiutinnagu, aammattaarli pisisartunik qitiutitsinerulernissamik suliniuteqarnera timitalersussallugu.
Siulersuisut tungaanniit suleqatigiinnissarput qilanaarutigaarput, maannamullu angusarereersimasanut sanilliullugu suli erseqqinnerusumik, KNi suliffeqarfittut nutaaliaasutut, qiilasutut, naleqqussarluarsinnaasutut niuernikkut aningaasarsiorluarsinnaasutut inuiaqatigiinnilu pingaarutilimmik suliassaqarnerminik ilisimaarinnilluartutut ingerlanneqalernissaanut, Niels Thomsen oqarpoq. Peter Grønvold Samuelsenimillu ilalerneqarluni.
- KNI'p pilersuisussaatitaasuunerminik qitiutitsinerminiit pisisartunik qitiutitsineruleriartornissaa soqutiginartippara, puigussanngilarpulli inuiaqatigiinni pisussaaffiligaammat, inoqarfinni aningaasarsiornerinnavik tunngavigalugu ingerlatsiffiusinnaanngitsuni allaat inuuniarnermi pingaaruteqarluinnartunik pilersuisussaatitaalluni, pisortaaninngorlaaq eqqaasitsivoq, ilanngullugulu erseqqissaatigalugu suliffimmi qiimaneq toqqissisimanerlu uterteqqittariaqartoq.
