KNI-mit qimarrattuarsinnarput
Maannalu Neqip pisortaa Carsten Jochumsen aamma soraarpoq. Qanittumi pisut pillugit soraarniuteqarluni Radioaviisimut ullumi oqaatigaa, itinerusumilli nassuiaarusunngilaq.
Aamma logistikkimut pisortaq Lars Steen Petersen soraarsimanerarneqarpoq. Taama Berlingske Business ullumi allappoq. Lars Steen Petersenilli tamanna ilumoornersoq Radioaviisip ualeq manna oqaluummagu oqaaseqarfigerusunngilaa.
Pisortat taakku marluk KNI-mit soraartut ilaannaraat, pisortaqarnikkullu ajornartorsiut ullormiit ullormut annertusiartuinnarpoq.
Neqimi pisortap logistikkimullu pisortap saniatigut aamma sulisunik aallussivimmi pisortaq, siulersuisuni ilaasortat pingasut, aningaasaqarnermut pisortaq, naatsorsuusserisut pisortaat niuernermillu pisortaq Claus Jensenip soraarsitaanerata kingorna suliffimminnit soraarniuteqarput.
Radioaviisip paasissutissai naapertorlugit soraarniutit sulisut 14-it sulisut allat qulit KNI-p Sisimiuni allafeqarfiani qinngasaarsimanerannut tunngavoq. Taama pisoqarmat pisortat qullersaata sulisut 14-it angerlartissimavai. Claus Jensenip soraarsitaanerata kingorna Peter Grønvold Samuelsen utaqqiisaasumik pisortatut sulisut taakku 14-it suliartoqqoqqissimavai, iliuuserisaat kinguneqartinnagit. Aalajangerneq ilaatigut sulisunik aallussivimmik pisortamit Käthe Franklinimit nuannarineqanngitsoq, taannami Radioaviisimut nalunaarpoq suliffeqarfimmi taamak pissuseqartumi suliinnarsinnaanani.
KNI-mi aalassassimaarneq Danmarkimi tusagassiutinit suli malinnaaffigineqarpoq.
Berlingske Tidendemi ullumi allaaserineqarpoq, aningaaseriviit tallimat, niuernermut suliffeqarfissuarmut 1 milliardit koruunit missaannik atukkiillutillu akiligassiisartut, KNI-p siulittaasuaanik, pisortamik Niels Thomsenimik, marlunngormat ataatsimeeqateqarnermi, piginnittut, Naalakkersuisunit sinniisuuffigineqartut, atorfinitsitsinerni akuusannginnissaat mianersoqqussutigineqarsimasoq, tassa siulersuisuni ulluinnarnilu aqutsisuni.
Berlingske Tidendemi allassimasut naapertorlugit pisortaanerup Claus Jensenip soraarsitaanerata kingorna sulisut aqqanillit siulersuisunullu ilaasortat pingasut soraareersullu, KNI aqutsisoqarnikkut ajornartorsiortorujussuuvoq.
KNI-mili siulersuisunut siulittaasup, Niels Thomsenip, aningaaserivinnik ippassaanikkunni ataatsimeeqateqarnermini neriorsuutigisimavaa, siulersuinut ilaasortat nutaat pisortalluunniit pillugit isumaqatigiissuteqartoqarnavianngitsoq.
