KNI aningaasaqarnermut pisortartaalersoq

Peter Wistoft KNI-mi marsip aallaqqaataani aningaasaqarnermut pisortanngoruni suliffeqarfiup aningaasaqarneranut akisussaalissaaq.

KNI tusagassiuutinut nalunaarummi allappoq.

KNI-p ‘suliffeqarfiup aningaasaqarneranut annertuumik sunniuteqartussamik’ suliffeqarfimmi ‘tunngaviusumik atugassarititat allanngoriartortut’ suliffeqarfiup tusagassiuutinut nalunaarummi aamma allappaa.

Suut allanngulernersut allannguutillu KNI-p aningaasaqarneranut qanoq sunniuteqassanersut nalunaarummi allanngilaat.

Suliassaq pissanganarluinnartoq

KNI-mili pisortaanerup, Jeppe Jensenip Peter Wistoft ‘toqqarluarneqarsoraa’.

Peter Wistoft-ip atorfininneratigut piginnaasaqarluartumik, periusissiullaqqissumillu aningaasaqarnikkut pisortartaassaagut. Piitap piginnaasaqarfigilluagai, suleqatigiinnermik siunertaqarluni aqutsineq kiisalu nunatsinni pissutsinut ilisimasaqarluarnerata piffissami allanngorarfiusumi aningaasaqarnermut pisortanngornissaata toqqarneranut peqqutaalluinnarput, Jeppe Jensen oqarpoq.

Pisortanngortussallu pisortanngornissaminut unammilligassaq pissannganarluinnartuusoraa.

- Unammilligassaq pissanganarluinnarpoq, Kalaallit Nunaanni inuiaqatigiinni allanngoriartortoqarpoq, tamakkualu KNI arlaatigut sunnertussaavaat. Suliassat ilagissavaat allannguutinut tamakkununnga KNI-p pimoorullugu tulluarsartuarnissaa, sullitatsinnut piginnittutsinnullu iluaqutaasussamik.

Peter Wistoftip atuuffik Jan H. Lynge-Pedersenimit nangissavaa.