KNAPK soraarsitsinermut: Sanngiikkutta anguniakkat anguneqarunnanngillat
KNAPK sanngiippallaarmat allamik pisortartaartoq, kattuffiup siulittaasua ungasinngitsukkut oqarpoq. Soraarsitsinerlu maanna itisilerpaa.KNAPK-mi qanittunnguaq tikillugu pisortaasoq Bjarne Lyberth, sapaatit akunnerisa ataatsip matuma siorna soraarsitaavoq. Taanna KNAPK-mi siorna septembarip aallaqqaataani pisortanngoraluarpoq.
Kattuffik siorna oktoberip aallartinnerani ataatsimeersuarmat, Nikkulaat Jeremiassen siulittaasunngorpoq. Taassuma qaammatip ataatsip iluani siulittaasooreernermini taamani pisortaasoq, Bjarne Lyberth nangaanartoqartilereersimallugu KNR-imi Inuiaat Tillernerannit apersorneqarnermini pingasunngornermi oqarpoq.
AAMMA ATUARUK Naalakkersuisunut ilaasortaasimasoq KNAPK-mi pisortatut atorfinitsinneqarallartoq
- Kattuffiup pisortaa eqqarsaatigalugu nammineq ilinniagarisimavaa biologeq. Tassani soorunami taanna ilinniakkani pikkoriffigivaa. Kisianni tassunga malugisinnaasakka malillugit imaannaarpasittanngeqaaq kattuffimmi pisortatut inissisimanera. Taamaattumik taanna isumaqarpunga aamma tassunga inummut tulluarnerusoq taamatut inissittoqarnera, Nikkulaat Jeremiassen oqarpoq.
Itisiliinerorusunngitsoq
Taassuma KNR-p nutaarsiassaqartitsivianut Bjarne Lyberthip pisortaanissaminut suna piukkunnanngissutigineraa itisilerusunngilaa.Taassuma aalisartut piniartullu kattuffianni ilaasortaqarnerpaami pisortaasoq uumassusilerituutut ilinniagaqartoq soraarseriarlugu, nutserisutut oqalutsitullu ilinniagaqartoq, Naalakkersuisunullu ilaasortaasimasoq, Vittus Qujaukitsoq pisortaanerugallartutut atorfinitsippaa.
Nikkulaat Jeremiassenip Inuiaat Tillernerannut oqarnera naapertorlugu, Bjarne Lyberth pisortaanerutillugu nammineq kattuffimmi siulittaasuusinnaanngilaq. Aamma kattuffiup ataatsimeersurnermi anguniagassatut siunnissai anguneqarsinnaannginnerarpai.
- Kattuffik allaffissornikkut sanngiitsigisoq inissisimaffigissallugu uanga tassaniissallunga tulluanngilanga. Aamma anguniakkat anguneqarunnanngillat, Nikkulaat Jeremiassen oqarpoq.
AAMMA ATUARUK KNAPK-imi soraarsitsisoqaqqippoq: Kattuffik sanngiikkami, siulittaasoq oqarpoq
Kattuffiup ilaasortaasa ataatsimeersuarnerminni anguniagassamik ilaattut kapisilinniarnerup aningaasarsiutaanerusinnaanerata misissorneqarnissaa aamma tunumi qaanaamilu qilalugartassat amerlineqarnissaat siunniuppaat.
KNR-p Bjarne Lyberth oqaaseqartikkusukkaluarpaa, nipagiussimasussaatitaaninili pillugu oqaaseqarusunngilaq.