KNAPK-imi soraarsitsisoqaqqippoq: Kattuffik sanngiikkami, siulittaasoq oqarpoq
Aalisartut Piniartullu Katuffiata KNAPK-ip allaffeqarfiani atorfilik alla soraarsinneqarpoq.
Pineqartoq tassaavoq Akara Skifte KNAPK-ip allaffeqarfiani siunnersortitut atorfeqartoq.
Tamanna KNAPK-ip siulittaasuata Nikkulaat Jeremiassenip KNR-imut uppernarsarpaa.
Siulittaasup soraarsitsinermut tunngavilersuutigaa kattuffik sanngiimmat nukittorsarneqartariaqarmallu.
AAMMA ATUARUK Naalakkersuisunut ilaasortaasimasoq KNAPK-mi pisortatut atorfinitsinneqarallartoq
Kattuffiup sanngiinnera nukittorsartariaqarneralu pillugu siulittaasoq itisileerusunngilaq aamma Akara Skifte-p atorfia kimit taarserneqassasoq oqaaseqarfigerusunngilaa.
Taamaalilluni KNAPK-ip allaffeqarfiani atorfiit sisamaasut ullut ikittut ingerlanerani marluk suliunnaarsinneqarput.
Iliuuseqarnissaq nukittorsarnerlu
KNAPK-mit tallimanngornermi nalunaarutigineqarpoq, kattuffiup allafeqarfiani direktøri Bjarne Lyberth soraarsinneqartoq.
Taannalu taarserlugu Vittus Qujaukitsoq atorfinitsinnearallartoq.
- Ulluinnarni Aqutsisut KNAPK-p allaffeqarfiani piffissami aalajangiilluinnartumi, angusaqarnissaq iliuuseqarsinnaanerlu pingaartillugit, nutaanik nukinnik siulersorneqarnissaa kissaatigaat, KNAPK -mi siulittaasoq tusagassiuutinut nalunaarummi taama allappoq.
AAMMA ATUARUK Hanseeraq melder sig ud af KNAPK efter 24 år: Jeg føler mig ensom
Vittus Qujaukisoq marsip qaammataata aallartinneraniilli KNAPK-mi siunnersortitut atorfinitsinneqarpoq.
Vittus Qujaukitsoq ukiorpassuarni politikkimi sulivoq.
Vittus Qujauitsoq naalakkersuisuni ilaasortaanikuuvoq.
Ilaatigut nunanut allanut aamma aatsitassanut naalakkersuisuulluni.
Pilersaarutit naapertorlugit KNAPK pisortamik atorfinitsitsissaaq juunimi 2022-mi atorfik inuttassarsiorneqareerpat.