Hanseeraq KNAPK-mit anisoq: Kiserliornarsivoq

Qarasaasiatigut atortut ukiuni kingullerni digitalinngoraluttuinnarput. Tamanna innuttaasut ukiuni kingullerni misigaat. Aamma raajarniat tamanna maanna aqqusaartussanngorpaat.

Angallatini raajarniartuni naalakkat, pisat oqimaassusaat sumilu pisarineqarnerat allattoqqissaartussaavaat. Taakkua ullumi pappiaqqanut allattorneqartarnerat allanngussaaq. Tassa elektroniskimik allattorneqartalissapput.

Umiarsuit allattaaviinut allattuineq kingusinnerpaamik ukioq manna marsip 31-nit elektroniskinngorsimassasoq Naalakkersuisut piumasaqarput.

AAMMA ATUARUK Sinerissap qanittuani raajarniat KNAPK-mit aneriarlutik kattuffiliulertut

Ingerlatseqatigiiffimmi Angunnguaq A/S-imi piginnittuullunilu pisortap, umiarsuup allattaaviisa nutaaliaasumik immersorneqartalernissaannut KNAPK-mit ikiorneqannginnini ilaatigut peqqutigalugu kattuffimmit anivoq.

- Logboginut immersuisarneq elektroniskinngortussaq tamakkua eqqarsaatigalugit kiserliornarsinermik, Hanseeraq Enoksen oqarpoq.

Immersukkat kukkuneqanngilluinnartumik immersorneqarnissaat pingaaruteqarpoq. Taakkumi aalisarnermut nakkutilliisunit aamma takuneqarsinnaasussaapput.

Hanseeraq Enoksenili naapertorlugu elektroniskimik atuilernissamut piffissarititaasoq qanillereersoq, KNAPK-mit suli ikiorneqanngillat. Taamaattumik angallataatimini naalakkaniluunniit immersueriaatsimik ikiorsinnaanngilai.

- Naalakkat aamma ajoqersuunniartussaavagut unioqqutitsissanngippata. Tamakkua aamma tamaasa ilikkartariaqaratsigit, Hanseeraq Enoksen oqarpoq.

AAMMA ATUARUK KNAPK kattuffiliulersaartunit tupaallatsinneqartoq

Pisortap sulisumik ajoqersuunnissaat nammineq akisussaaffigaa, KNAPK-miilli ikiorneqarnissani neriuutigisimagaluarpaa.

Taanna nammineerluni KNAPK-mut ikioqqulluni saaffiginninngilaq. Kattuffik nammineerluni siusinnerusukkut tutsaqartarmat taamak iliortoqaqqinnissaa naatsorsuutigisimagaluarpaa.

Hanseeraq Enoksen sinerissap qanittuani raajarnianut maanna kattuffiliulersaartunut ilaavoq.