KNAPK: qalerallit milligaluttuinnarnerat aarlerinarpoq

Qalerallit Ilulissat eqqaani aalisarneqartartut ukiuni kingullerni milligaluttuinnarnerat aalisarneqartarnerallu allanngorani ingerlaannassappat aarlerinartoqartoq, KNAPK isumaqarpoq.
Allattoq Jaaku Lyberth
oktobarip 07-at 2014 14:48

Aalisartut anginerusunik qaleralinniartarnissaat soqutiginarsarneqarsinnaavoq mikisunillu aalisarfiusuni unikaallatsitsineq periarfissatut isigineqarluni.

- Ajorsigaluttuinnartoq uppernarsarsinnaatillugu  soorunalumi ernumassutissaqarpugut, aalisartullu qaleralinnik anginerusunik  aalisarsinnaanerat  soqutiginarsarneqarsinnaavoq -  KNAPK-p siulittaasua Henrik Sandgreen  oqarpoq.

 

Qalerallit anginerusut sumi aalisarneqarsinnaanerat aalisartut nalunngikkaat, KNAPK-ip siulittaasuata oqaatigaa. - Qaleralinniarneq unitsikkallarneqassappat aalisakkanillu allanik aalisarsinnaaneq qulakkeerneqassappat, tamanna aalisartut tunisassiorfiillu akornanni oqaloqatigiissutigineqartariaqarpoq, Henrik Sandgreen oqarpoq.

 

Qalerallit Ilulissat eqqaanni milligaluttuinnarnerat, qalerallit pillugit siunnersuisoqatigiit ulluni qaninnermi isummerfigissavaat.