KNAPK-p siulittaasuata raajarniat isornartorsiutaat ilisarisinnaanngikkai

KNAPK-p siulittaasuata, Nikkulaat Jeremiassenip, Hanseeraq Enoksenip kattuffimmit aneriarluni raajarnianut kattuffiliulersaartunut ilanngunnera ajuusaarnaraa.

Siulittaasup Hanseeraq Enoksenip KNAPK-mit ikiorneqannginnerarluni oqaasii ilisarinngilai.

- Tassani oqariartuutigineqartoq ilisarisinnaanngilara, KNAPK-p siulittaasua, Nikkulaat Jeremiassen KNR-mut oqarpoq.

AAMMA ATUARUK Hanseeraq melder sig ud af KNAPK efter 24 år: Jeg føler mig ensom

Angallatit allattaaviisa elektroniskimik allattorneqartalernissaat kingusinnerpaamik marsip naanerani atuutilissaaq. Hanseeraq Enoksenillu ilaatigut tassunga ikiorneqannginninni KNAPK-mut akiliisarunnaarnerminut tunngavilersuutigaa. Kisianni kattuffimmut ikioqqulluni attaveqarsimanngilaq.

- Naammagisaqarsimanngikkunillu kattuffimmut attaveqarnissaminnut tikilluaqqusaapput. Kisianni uani anianermut tunngatillugu, tassangaannaq naammagittaalliuuteqaratilluunniit taamak pisoqarnera soorunami kattuffimmiit tupaallannartorujussuuvoq, Nikkulaat Jeremiassen oqarpoq.

Raajarniat suli tikilluaqqusaasut

Hanseeraq Enoksenip ukiorpassuarni ilaasortaaffigisaata siulittaasuata, ilaasortatoqqap allamut saannera ajuusaarutigaa. Taamaakkaluartoq ilaasortaajunnaartoq aalisartut piniartullu kattuffianni ilaasortaqarnerpaami suli tikilluaqqusaavoq.

- Uannut ajuusaarnartorujussuuvoq taamatut siulittaasunngorlaatut taamatut pisoqarnera. Hanseeraq anereeraluaruniluunniit tikilluaqqusaavoq, qaqugukkulluunniit attaveqarsinnaanerminut.

Sisimiormiu raajarniaq, Hanseeraq Enoksen, KNAPK-mut ukiut 24-it ilaasortaareerluni ilaasortaajunnaarpoq. Taanna ilaatigut KNAPK-mi siulittaasuusimasoq, Henrik Sandgreen peqatigalugu sinerissap qanittuani raajarnianut kattuffiliulersaartunut akuuvoq.