KNAPK-p saarulliit uumatitsivinni qungasut ernumassutigigai
Royal Greenlandip aalisakkanik aallerniartarnerata arriippallaarnera pissutigalugu aalisakkanik uumatitsivissuarni silaannaarullutik toqusinnaasarput.
Aalisartut piniartullu kattuffiat taama isumaqarpoq.
- Aalisartut Royal Greenlandimik utaqqisarnertik sivisusangaarmat aalisakkat toqoralertartut oqaatigaat. Tamanna aalisartunut inuiaqatigiinnullu aningaasartuutaanerussanngimmat maannakkut qisuariaateqarpugut, KNAPK-p siulittaasua, Nikkulaat Jeremiassen oqarpoq.
Saarulliit uumatitsivinniittut
- Saarulliit bundgarnimik pisarineqartut tamarmik Royal Greenlandip aallernissaanut ullut 14-it sioqqullugit uumatitsivimmiissapput.
- Aalisagaq ulluni ikinnerpaamik 14-ini uumatitsivimmeereeraangami nerpia sarajakkunnaartarpoq, tamanna aalisakkap salunnerulerneranik pissuteqarpoq.
- Aalisartoq uumatitsivimmik arlalinnilluunnit attartorniaruni isumaqatigiissut atuarlugulu atsiussavaa.
- Tassani assersuutigalugu aalisakkat Royal Greenlandip umiarsuaanut katersuutaasumut tunniunneqarnissaata tungaanut aalisartut aalisakkanik piginnittuusut allassimavoq.
- Uumatitsiviit kuut eqqaanni sumiiffinniluunniit tarajoqanngitsumik imeqarfiusup eqqaani inissinnginnissaat pingaaruteqarpoq.
- Saarulliit pisarineqartut tamarmik Maniitsumi tunisassiarineqarput.
Aalisartut amerlaneruleriartuinnartut uumatitsivinnik, saarulliit tunisassiorfinnut tunineqartigatik ulluni ikinnerpaamik 14-ini inissisimaffigisartagaannik, atuipput.
Aalisakkat uumatitsivinniinnerminni sanigorsarnissaat pissutaavoq. Taakku imaanit bundgarnit atorlugit pisarineqartarput, uumatitsivinniinnerminnilu sanigortarput – taamaalillutik nerpii sarajakkunnaarput.
Tamanna nunat tamalaat akornanni niuerfinnik atuisut kissaatigisaraat.
Aalisartut piniartullu kattuffiata oqarnera naapertorlugu saarulliit uumatitsivinni 400-sunit sisamani toqusoortoqartarpoq. Tassa uumatitsivinnit tamanit 1 procentiini.
Uumatitsivinniittunili toqusoorutit siornamut naleqqiullugit ikinnerupput, KNAPK-p oqarnera naapertorlugu uumatitsivinni 300-nit 23-ni siorna maajimit aggustimut toqusoortoqarsimavoq.
Naalli siornanit ajunnginnerugaluaqisoq, Royal Greenlandip saarullinnik aallertarnera akuttuallaartoq, KNAPK-p isumaqarpoq.
Royal Greenland: Aalisartut namminneq akisussaaffigaat
Aalisakkanik uumatitsivinni saarulliit amerlanerpaamik 20 tonsiusinnaapput.
Amerlavallaaraangamilli ipillutik immalluunniit tarajukippallaarneranik toqusinnaasartut, Pinngortitaleriffimmi aalisakkanik ilisimatusartoq Rasmus Nygaard oqarpoq.
Royal Greenlandip saarullinnik aallikulanerusinnaallutik nassuerutigaa, aalisartulli namminneq saarulliit nakkutigalugit paarinissaat akisussaaffigigaat, attaveqaqatigiinnermut pisortaq, Masaana Egede, oqarpoq.
- Aalisartut uumatitsivinnik paarsinissartik namminneq akisussaaffigaat. Tamanna atsiortarpaat, taanna oqarpoq, nangillunilu:
- Utaqqinerulli sivikinnerulersinnissaanut umiarsuarput Tuneq atulerneqarpoq, taannalu inissaqarnerungaatsiarpoq.
AAMMA ATUARUK Sisimiuni Maniitsumilu saarullippassuit uumatitsivinni toqungasut
Saarulliili paarinissaannut akisussaaffik erseqqilluinnartumik agguarneqarsimasoq, Masaana Egede oqarpoq.
- Aalisartut aalisakkat toqunnginnissaannut paarsilluarnissaminnut akisussaaffeqarput.
- Aatsaat Royal Greenlandimut, tunitsivimmut Tunermulluunniit tunniunneqaraangata Royal Greenland aalisakkanut akisussaalertarpoq.
Royal Greenlandip saarullinnik uumatitsivinnik attartortitsisarneq 2015-imi aallartippaa.
Aalisakkerivissuaq uumatitsivinnik aalisartorpassuarnut ullumik attartortitsisarpoq.
Erseqqissaaneq: Ilanngutassiami siusinnerusukkut saarullippassuit uumatitsivinni silaannaarullutik imaluunniit tarajukippallaartumiillutillu toqusartut allassimagaluarpoq. Tamanna ilumuunngilaq. Erseqqissaassutigissavarput saarulliit silaannamik amigaateqarlutik imaluunniit tarajukippaallartumiillutilluunniit toqusinnaasut eqqortuummat.
